Það eru fínustu aðstæður hér í Krikanum. Nánast logn og engin úrkoma. Reyndar bara fjórar gráður, nauðsynlegt að klæða sig vel.

Byrjunarliðin eru komin inn.

Sigurvin gerir þrjár breytingar á liði sínu frá leiknum gegn ÍBV. Ástbjörn Þórðarson er ekki í leikmannahópi FH og þeir Steven Lennon og Baldur Logi Guðlaugsson taka sér sæti á bekknum. Inn í liðið koma þeir Matthías Vilhjálmsson, Eggert Gunnþór Jónsson og Oliver Heiðarsson. Jóhann Ægir Arnarsson er væntanlega í hægri bakverðinum hjá FH.

Sigurður gerir þrjár breytingar á liði sínu frá leiknum gegn Fram. Daði Bærings Halldórsson, Dagur Austmann og Davíð Júlían Jónsson taka sér sæti á bekknum og inn í liðið koma þeir Adam Örn Arnarson, Kristófer Konráðsson og Birgir Baldvinsson.

Dómarateymið
Helgi Mikael Jónasson er með flautuna í leiknum í dag. Honum til aðstoðar eru þeir Bryngeir Valdimarsson og Eðvarð Eðvarðsson. Erlendur Eiríksson er varadómari og Einar Örn Daníelsson er eftirlitsmaður KSÍ.

Sápan spáir Leiknissigri!
Stefán Árni Pálsson þáttarstjórnandi Seinni Bylgjunnar á Stöð 2 Sport spáir í leiki umferðarinnar.

FH 0 - 1 Leiknir
Þjálfaradramað í vikunni hefur áhrif á annað hvort liðið. Ég held að það muni hafa verri áhrif á FH liðið og Leiknir nær að kreista út 1-0 sigur með marki þegar um fimmtán mínútur eru eftir.

Leikurinn verður vel lokaður fram að því. Bergerinn skorar og þetta verður ljótasta mark tímabilsins.
Stefán Árni
Emil Berger

Leikurinn stærri fyrir FH en Leikni
Rafn Markús Vilbergsson, sérfræðingur útvarpsþáttarins Fótbolti.net, rýndi í þennan leik.

"Ég held að þessi leikur sé stærri fyrir FH heldur en Leikni. Leiknir á þannig prógramm eftir. Með tapi FH þá verður brekkan helvíti brött fyrir FH en ef Leiknir tapar þá á liðið samt enn möguleika á að ná að bjarga sér," segir Rafn Markús.

Þrjár umferðir eru eftir af deildinni þegar þessum leik lýkur. Fyrir FH, er þessi leikur gegn Leikni mikilvægari fyrir FH en sjálfur bikarúrslitaleikurinn?

"Á ákveðinn hátt. Sigur í bikarnum hefði gefið mikið, ef liðið hefði unnið þann leik, náð Evrópusæti og endað í 10. sæti hefði það á endanum verið flott niðurstaða. Auðvitað vill FH ekki falla, það yrði risahögg, mikið bakslag. Miðað við hvernig liðið spilaði gegn Víkingi í úrslitaleiknum var svekkjandi fyrir það að vinna ekki."

"FH hefur reynt allt, það er búið að halda samstöðufundi og hitt og þetta. Aðalmálið í þessum leik liggur hjá leikmönnum, hvort liðið er tilbúnara í þennan bardaga. Það er meiri reynsla hjá FH en það er líka hörkureynsla í Leiknisliðinu. Margir leikmenn þar þekkja það að berjast fyrir lífi sínu," segir Rafn Markús.

"Þessi lið hafa verið að fá á sig mörg mörk. FH-ingar hafa í grunninn ekki náð að setja liðið sitt almennilega saman. Markmannsstaðan hefur verið vandræði, það vantar leiðtoga í varnarleikinn. Þessir eldri leikmenn hafa ekki verið að skila nægilega miklu, það vantar aðila til að taka liðið á sínar herðar á vellinum."



Smelltu hér til að hlusta á útvarpsþáttinn

Niðurstaða úr skoðanakönnun sem var á forsíðu.

Gífurlega mikið undir

Liðin eru í 10. og 11. sæti deildarinnar fyrir leikinn í kvöld. Leiknir er með einu stigi meira og verða níu stig í pottinum eftir leikinn. ÍA er svo með stigi minna en FH í botnsætinu.

Fyrri leikur liðanna á tímabilinu á Kaplakrikavelli endaði með 2-2 jafntefli og voru þeir Ólafur Jóhannesson og Sigurbjörn Hreiðarsson látnir fara sem þjálfarar FH eftir leik.

9. ÍBV 23 -10 23
10. Leiknir R. 23 -29 20
11. FH 23 -9 19
12. ÍA 24 -29 18

Veriði velkomnir lesendur góðir í beina textalýsingu frá fallbaráttuslag FH og Leiknis í Bestu deildinni. Leikurinn átti upprunalega að fara fram í gær en sökum veðurs var leikurinn færður um rúmlega sólarhring.