SKÝRSLAN: Blikar unnu sinn annan leik í röð
Hvað réði úrslitum?
Markið frá Arnþóri Ara eftir frábæra sendingu frá Guðjóni Pétri réði úrslitum í vægast sagt tilþrifalitlum leik.
Bestu leikmenn
1. Elfar Freyr Helgason (Breiðablik)
Var mjög traustur í sínum leik og sló vart feilnótu. Hvatti sína menn óspart áfram og stjórnaði vörninni eins og herforingi.
2. Oliver Sigurjónsson (Breiðablik)
Hann var mjög öflugur á miðjunni og spilaði af öryggi í sínum leik.
Atvikið
Lítið er hægt að týna til í þessum leik nema markið fallega hjá Arnþóri Ara. Þess má þó geta að í kvöld spilaði Gunnleifur markvörður Breiðabliks sinn 200 leik í efstu deild og þurfti hann lítið að hafa fyrir því að fagna þeim áfanga í kvöld.
Hvað þýða úrslitin?
Blikar halda áfram á sigurbraut og eru komnir í þriðja sætið. Skagamenn eru ekki á góðri leið og halda áfram að vera í botnbaráttunni.
Vondur dagur
Þetta var vondur dagur fyrir Skagaliðið í heild sinni. Liðið skapaði sér sárafá færi og þeir þurfa að sýna miklu betri leik ef þeir ætla að halda sæti sínu í deildinni.
Dómarinn - 7.5
Þóroddur stjórnaði leiknum af stakri prýði. Fátt reyndi á hann í leiknum nema helst að halda sér vakandi á löngum köflum.