SKÝRSLAN: Ólsarar horfðu á KR-inga í háflugi
Hvað réði úrslitum?
Furðulegur fótboltaleikur. KR-ingar héldu fótboltasýningu í fyrri hálfleik og yfirburðirnir voru algjörir. Að Ólsarar hafi haldið sér á lífi og náð svo að jafna í seinni hálfleik er með hreinum ólíkindum. En á endanum voru það KR-ingar sem sýndu karakter og lönduðu gríðarlega sanngjörnum sigri.
Bestu leikmenn
1. André Bjerregaard - KR
Hvalreki fyrir KR-inga virðist vera. Þessi duglegi og kraftmikli sóknarmaður gerir leikmenn í kringum sig betri. Er að ná vel saman með Tobias Thomsen. Stórleikur hjá þeim danska.
2. Pálmi Rafn Pálmason - KR
Hörkuflottur í kvöld. Það er leiðinlegt að geta ekki gefið fleiri bónusstig. Óskar Örn Hauksson og Tobias Thomsen áttu til að mynda vel skilið að fá bónusstig.
Atvikið
Maður trúði ekki eigin augum þegar Ólsarar jöfnuðu en atvikið fær André Bjerregaard fyrir markið sem kom KR í 3-2. Þrumuskot. Fallegt mark.
Hvað þýða úrslitin?
KR er á flugi eftir þrjá sigurleiki í röð. Liðið hefur fundið gírinn og er stórskemmtilegt á að horfa í þessum ham. Næsta markmið hjá þeim er að komast í Evrópusæti. Barátta Ólsara fyrir lífi sínu í deildinni heldur áfram.
Vondur dagur
Allir í Víkingsliðinu nema Cristian Martinez vilja gleyma fyrri hálfleiknum sem fyrst! Markvörðurinn hélt Ólsurum á lífi og varði hvað eftir annað. Flestir náðu nú að rífa sig betur í gang í seinni hálfleik en Aleix Egea fær lægstu einkunn af leikmönnum. Lét á köflum fara mjög illa með sig og náði stundum ekki að standa í lappirnar.
Dómarinn - 5,5
Dómgæslan réði ekki úrslitum í kvöld þó nokkrar ákvarðanir dómaratríósins hafi verið furðulegar.