Góða kvöldið! Það er spenna í lofti á Vodafonevellinum þar sem Valur og KR mætast í Reykjavíkurslag klukkan 19:15.

Báðir þjálfararnir hrista upp í byrjunarliðinu frá því í síðari hálfleik. Hjá KR koma bakverðirnir Magnús Már Lúðvíksson og Gunnar Þór Gunnarsson inn fyrir Hauk Heiðar Hauksson og Guðmund Reyni Gunnarsson. Emil Atlason tekur einnig stöðu Dofra Snorrasonar í liðinu síðan í 3-2 sigrinum á ÍBV fyrir helgi.

Kristján Guðmundsson, þjálfari Vals, gerir fimm breytingar frá því í 1-0 tapinu gegn Breiðablik. Haukur Páll Sigurðsson er klár eftir meiðsli og þeir Hafsteinn Briem, Hörður Sveinsson, Ásgeir Þór Ingólfsson og Úlfar Hrafn Pálsson koma inn. Matarr Jobe er ekki með í dag og þá detta Matthías Guðmundsson, Atli Heimisson, Kristinn Freyr Sigurðsson og Brynjar Kristmundsson einnig út úr liðinu.

Leikmenn eru að hita upp í sólinni á Vodafonevellinum. Gunnar Jarl Jónsson dómari leiksins er einnig farinn að hita upp með aðstoðarmönnum sínum Birki Sigurðarsyni og Andra Vigfússyni.

Þónokkur fjöldi áhorfenda er mættur nú þegar en Valsmenn hafa staðið fyrir hátíðardagskrá í dag þar sem fólk hefur meðal annars verið að gæða sér á hamborgurum frá Hamborgarafabrikkunni.

Minnum fólk að sjálfsögðu á að nota hashtagið ,,fotbolti\" á Twitter færslur tengdar leiknum.

Áhorfendur flykkjast á völlinn enda veðrið flott. Um að gera að rífa sig upp úr sófanum og mæta Vodafonvöllinn til að sjá stórleik!

Liðin eru mætt inn á völl. Fyrir leik heilsa formaðurinn Börkur Edvardsson og Hrafnhildur Skúladóttir fyrirliði kvennaliðs Vals í handbolta upp á leikmenn.

Leikurinn er hafinn. KR-ingar leika í átt að Keiluhöllinni og byrja með boltann.

Guðjón Pétur Lýðsson spilar ekki á miðjunni hjá Val í dag heldur á vinstri kantinum. Hörður Sveinsson er síðan fremstur en hann hefur tekið sæti Atla Heimissonar.

Fyrsta færi leiksins og það munar engu að KR-ingar komist yfir. Óskar Örn Hauksson fær svæði á vinstri kantinum og gefur fyrir á fjærstöng þar sem Emil Atlason á hörkuskalla sem Sindri Snær Jensson ver út í teig. Viktor Bjarki Arnarsson fær boltann en Sindri Snær ver skot hans í horn.

Guðjón Pétur Lýðsson á góðan sprett þar sem hann sólar Grétar Sigfinn Sigurðarson upp úr skónum og á fyrirgjöf sem Rhys Weston skallar í horn.

Peppi Pepsi-kall er mættur á völlinn og í stúkunni er Baldur Bongó í stuði með trommurnar fyrir Valsmenn. KR-ingar eru einnig fjölmennir en stúkan er full og þá er talsvert af fólki í stæðunum á hinum enda vallarins.

Magnús Már Lúðvíksson er of seinn í skallabolta og skallar Úlfar Hrafn Pálsson. Gunnar Jarl biður Magnús að róa sig en Valsmenn eru ósáttir og heimta spjald.

Hættulegasta færi Vals í leiknum! Rúnar Már Sigurjónsson leikur á varnarmann og á þrumuskoti úr vítateignum með vinstri fæti en Hannes nær að verja í horn.

Kjartan Henry Finnbogason vinnur boltann í miðjuboganum þegar Halldór Kristinn Halldórsson skallar í hann. Kjartan Henry tekur á rás og nær á endanum skoti úr þröngri stöðu en Sindri Snær ver.

Rólegt yfir leiknum þessa stundina, KR-ingar þó öllu líklegri.

Búið er að flauta til leikhlés. Markalaust eftir frekar tíðindalítinn fyrri hálfleik. Við skulum vona að við fáum mörk í sólinni í síðari hálfleik.

,,Þetta er agalegur leikur, jahérna,\" segir Bjarni Fel sem lýsir leiknum í KR-útvarpinu. Ekki fyrsti leikurinn sem Bjarni sér á ferlinum.

Við skulum vona að Bjarni Fel fái fleiri færi í síðari hálfleiknum. Valsmenn hafa lokið við sérstakar upphitunaræfingar fyrir síðari hálfleikinn og Gunnar Jarl hefur flautað á.

Vallarmet! 2628 áhorfendur eru á vellinum í kvöld og það er met á Vodafonevellinum.

Hafsteinn Briem á skot sem fer langt yfir, svo langt yfir að boltinn fer yfir vegginn fyrir aftan markið og út á götu.

Guðjón Pétur Lýðsson á góða sendingu inn fyrir á Hörð Sveinsson en Hannes Þór Halldórsson er rétt á undan í boltann.

Hörður Sveinsson tekur boltann á ,,kassann\" og skorar með skoti í fjærhornið en markið er dæmt af vegna rangstöðu.

Gunnar Jarl Jónsson spjaldar Frey Alexandersson aðstoðarþjálfara Vals. Þeir félagar léku saman í vörn Leiknis R. á sínum tíma. Freyr var hægri bakvörður á meðan Gunnar lék í hjarta varnarninar og lét finna vel fyrir sér.

KR-ingar virðast vera að góðri leið með að sigla sigrinum heim.

Matthías Guðmundsson nálægt því að jafna. Átti skalla eftir aukaspyrnu sem Hannes Þór Halldórsson varði vel út við stöng.

Leiknum er lokið með 1-0 sigri KR-inga en Magnús Már Lúðvíksson skoraði markið sem skildi liðin að. Nánari umfjöllun um leikinn kemur á Fótbolta.net innan tíðar.