SKÝRSLAN: Fylkismenn átu Blika með húð og hári
Hvað réði úrslitum?
Helgi Sigurðsson getur farið skælbrosandi inn í helgina. Hann henti Fylkisliðinu í 3-5-2, hans menn mættu hrikalega vel gíraðir og topplið deildarinnar átti engin svör. Í raun átti þessi leikur aldrei að vera spennandi í endann, svo mikið betri voru heimamenn. En ofboðslega var þessi leikur góð skemmtun!
Bestu leikmenn
1. Valdimar Þór Ingimundarson - Fylkir
Skítlétt að velja mann leiksins. Valdimar var geggjaður í kvöld. Tvö mörk, stoðsending, barátta, hlaup, leikgleði... það var allt til staðar.
2. Helgi Valur Daníelsson - Fylkir
Hljóp endalaust. Þessi gæi á allt hrós skilið og magnað hvað hann er í góðu standi.
Atvikið
Þegar Fylkir braut ísinn á 6. mínútu. Valdimar með frábæra pressu á Gunnleif sem sparkaði knettinum í bakið á honum. Valdimar þakkaði fyrir sig og setti boltann í tómt markið.
Hvað þýða úrslitin?
Blikar missa toppsætið á morgun þegar Skagamenn mæta KR. Liðsheild Fylkis var aðdáunarverð í kvöld og liðið er búið að tengja saman tvo sigra og koma sér í fín mál í fjórða sætinu.
Vondur dagur
Blikar voru samstíga í því að vera óhemju slakir í kvöld. Það leit út eins og þeir hefðu eitt landsleikjahlénu á Benidorm. Fengu á sig fjögur mörk sem er ansi óvanalegt. Það stóð ekki steinn yfir steini í varnarleiknum og bölvanlega gekk hjá þeim að tengja saman sendingar. Liðið átti ekkert skilið í þessum leik.
Dómarinn - 6,5
Hefði mögulega getað hent Brynjólfi Darra í sturtu í lok leiks og það voru nokkur atvik sem ég var ekki sammála. En í heildina með fín tök.