SKÝRSLAN: Keflavík kjöldró Stjörnuna
Hvað réði úrslitum?
Kraftur, áræðni og liðsheild heimakvenna var til fyrirmyndar í kvöld. Þær voru á undan í alla bolta, töpuðu varla návígi og gáfu Stjörnunni aldrei færi á að komast í takt við leikinn. Frábær liðssigur og gefur góð fyrirheit fyrir framhaldið.
Bestu leikmenn
1. Natasha Moraa Anasi
Hún átti völlinn í kvöld hvert og eitt einasta strá, hljóp úr sér lungun, valtaði yfir miðjumenn Stjörnunar, vann boltann í gríð og erg og skoraði gott mark auk þess að taka þátt í að skapa tvö önnur. Frábær leikur hjá frábærum leikmanni.
2. Sveindís Jane Jónsdóttir
Síógnandi og hefði líklega átt að skora meira en bara eitt mark. Var mikið að skapa fyrir liðsfélaga sína og þessi löngu innköst...... bara vá. Hver og einn einasti leikmaður Keflavíkur á þó á sinn hátt skilið að vera á þessum lista þær áttu frábæran leik allar sem ein.
Atvikið
Upphaf beggja hálfleikja. Að mæta með slíkum krafti og slá andstæðinginn niður strax í upphafi var sterkt hjá Keflavík.
Hvað þýða úrslitin?
Keflavík fer í 6 stig og lyftir sér upp úr fallsæti og skilur KR eftir á botninum. Stjarnan situr enn í 5.sæti með sín 9 stig en þarf að laga ansi margt.
Vondur dagur
Þetta var skuggalega slæmur dagur fyrir Kristján Guðmundsson að þurfa að horfa upp á slíkt andleysi hjá liði sínu og þær sýndu í dag. Mikið sem þarf að laga ef Stjarnan ætlar að vera með í þessari deild.
Dómarinn - 6
Ekki slæmur en ekki góður heldur. Spar á spjöldin og flautaði oft ekki á augljós brot. Hafði þó núll áhrif á úrslit leiksins.