SKÝRSLAN: FH sá rautt og flóðgáttir opnuðust
Hvað réði úrslitum?
Eftir að hafa byrjað leikinn herfilega náðu Blikar að vinna sig upp úr brekkunni (hmmm hljómar kunnuglega). Eftir að rautt spjald fór á loft í stöðunni 2-1 átti FH skyndilega engin svör, Fimleikafélagið lék hörmulega tíu gegn ellefu og Blikar voru í stuði með baneitraðar fyrirgjafir inn í teiginn.
Bestu leikmenn
1. Thomas Mikkelsen - Breiðablik
Daninn er gammur í teignum. "Thomaaas igen. Kom så min danske ven. Jeg elsker dig" skrifuðu Blikar á Twitter. Frekari orð eru óþörf.
2. Alfons Sampsted - Breiðablik
Margir sem komu til greina númer tvö, en Alfons átti margar hættulegar fyrirgjafir og hirðir þetta.
Atvikið
Jöfnunarmark Höskuldar. Blikar náðu að jafna í 2-2 strax eftir að FH fékk rauða spjaldið og það setti tóninn.
Hvað þýða úrslitin?
FH var farið að ógna öðru sætinu en Blikar skoruðu aftur fjögur mörk gegn Hafnfirðingum og virðast algjörlega límdir við þetta annað sætið.
Vondur dagur
Varnarleikur FH var skelfilegur í kvöld. Daði í markinu hafði ekki nægilega mikil völd í teignum, miðverðirnir í brasi og bakverðirnir hleyptu of mörgum fyrirgjöfum í gegn. Falleinkunn á alla aftast hjá heimamönnum. Fyrirliðinn Davíð Þór Viðarsson fær rautt og það er vendipunkturinn.
Dómarinn - 7
Erfiður leikur að dæma en Villi stóð sig vel. Úr fréttamannastúkunni virtist rauða spjaldið réttur dómur.