SKÝRSLAN: FH-ingar fengu skell í Víkinni
Hvað réði úrslitum?
Víkingar voru einfaldlega bara miklu betri frá fyrstu sekúndu. Byrjuðu leikinn af krafti gegn máttlausum FH-ingum og uppskáru mark um miðjan fyrri hálfleik. Voru komnir í 3-0 í hálfleik og þá var róðurinn einfaldlega of erfiður fyrir FH.
Bestu leikmenn
1. Óttar Magnús Karlsson
Þrenna. Það dugar í mínum bókum sem maður leiksins. Hefði hæglega getað skorað fleiri ef eitthvað er.
2. Ágúst Eðvald Hlynsson
Ótrúlega góður leikur hjá Ágústi. Hljóp eins og brjálæðingur og virtist fara vel í taugarnar á FH-ingum. Geggjuð stoðsending hjá honum í fyrsta markinu. Ætla að gefa Davíð Atla og Jóel boltastrák shoutout hérna líka.
Atvikið
Þriðja mark Víkinga. Óttar vinnur aukaspyrnu út við hronfánann og virtust FH-ingar eitthvað ósáttir við það og vildu láta Pétur dómara vita af því. Boltastrákurinn Jóel var fljótur að átta sig og sendi boltann snöggt á Óttar sem að lagði hann snögglega fyrir sig og rúllaði boltanum í markið úr mjög þröngu færi. Algjört sprellimark.
Hvað þýða úrslitin?
Víkingar ná í sinn fyrsta sigur í Pepsi Max-deildinni og eru með 5 stig. FH-ingar tapa sínum fyrsta leik og eru ennþá með 6 stig.
Vondur dagur
Morten Beck Guldsmed átti ekki breik í dag. Sama hvað hann reyndi þá gekk ekkert upp hjá honum. Leikur sem að Daninn stóri mun vilja gleyma.
Dómarinn - 5
Þetta er rosalega flókið. Mér fannst Pétur svona framan af standa sig fínt í leiknum en það er eitthvað um vafaatriði. Vítið sem að FH fékk var klár leikaraskapur hjá Herði Inga og svo veit ég ekki hvaða reglur eiga að gilda um þriðja mark Víkinga. Þá hefði Víkingur hæglega getað fengið tvær vítaspyrnur. Erfiður leikur að dæma.