SKÝRSLAN: KR skemmdi Íslandsmeistarapartýið
Hvað réði úrslitum?
Það gustaði ágætlega í kvöld og liðin voru í smá brasi með að ná stjórn á boltanum. Það voru svo KR sem nýttu færin og þar við sat. Stöngin út fyrir Blika en gríðarlega sterkur sigur hjá KR.
Bestu leikmenn
1. Kristinn Jónsson
Blikinn í liði KR var örlagavaldur hér í kvöld. Átti stórkostlega fyrirgjöf fyrir markið sem var teiknuð á pönnuna á Kristjáni Flóka sem skoraði eina mark leiksins.
2. Kristján Flóki Finnbogason
Fyrsti byrjunarliðsleikur Flóka í Bestu deildinni í ár og hann skila sigurmarki gegn Íslandsmeisturunum.
Atvikið
Flugeldasýning, heiðursvörður og Blikafánar flögrandi um í upphafi leiks þegar nýkringdir Íslandsmeistarar Breiðabliks gengu út á völl.
Hvað þýða úrslitin?
Má færa rök fyrir að þetta hafi verið þýðingarlítill leikur fyrir bæði lið. Breiðablik þegar orðnir Íslandsmeistarar og KR geta mest náð 4.sæti sem gefur félaginu afskaplega lítið. KR er fyrsta liðið til þess að sigra Blika á útivelli síðan þeir sjálfir gerðu það í fyrstu umferð á síðasta tímabili.
Vondur dagur
Það var enginn sem bar sérstaklega af í dag og að sama skapi þá var enginn sem á endilega skilið sæti hérna.
Sóknarleikur Blika átti slæman dag.
Dómarinn - 5
Það voru nokkur atriði í leiknum sem hægt var að setja spurningarmerki við. Flestir vafadómar féllu með KR í kvöld.