SKÝRSLAN: Raggi Sig sækir stig í sínum fyrsta leik
Hvað réði úrslitum?
Þetta var þessi klassíski leikur tveggja hálfleika. Framarar voru betri í fyrri hálfleik en svo fóru þeir að dala í þeim seinni og Fylkismenn komu sterkir til baka. Gestirnir geta jafnvel verið pínu svekktir að ná ekki sigurmarkinu í lokin þar sem þeir lágu á Frömurum á lokamínútunum
Bestu leikmenn
1. Pétur Bjarnason (Fylkir)
Innkoma Péturs gjörbreytti sóknarleik Fylkismanna. Þeir urðu meira direct og Pétur stóð sig mjög vel í að leiða línuna. Svo skoraði hann jöfnunarmarkið sem sakar ekki.
2. Aron Snær Ingason (Fram)
Aron Snær var virkilega öflugur og þá sérstaklega í fyrri hálfleik. Hann kom með stoðsendinguna að marki Framara og svo var hann mjög iðinn í varnarleik liðsins þegar þurfti.
Atvikið
Það voru þó nokkur vítaköll í leiknum en það var ekkert dæmt. Mér fannst það vera svona mest megnis allt rétt hjá Arnari dómara nema mögulega þegar Ragnar Bragi virðist gefa Guðmundi Magnússyni olnbogaskot inn í teig. Endursýningar sýna það ekki vel en frá mínu sjónarhorni upp í stúku virtist þetta vera víti fyrir mér.
Hvað þýða úrslitin?
Fylkir fer upp í 9. sæti með þessu stigi og eru jafnir ÍBV á stigum en með betri markatölu. Framarar eru áfram í 11. sæti 2 stigum á eftir ÍBV og Fylki.
Vondur dagur
Guðmundur Magnússon átti erfitt uppdráttar í þessum leik. Ég held mikið upp á þennan leikmann og finnst því vont að setja hann hérna. Hann var fínn framan af í fyrri hálfleik en eftir því sem leið á leikinn virtist hann þreytast meira en aðrir í kringum sig og var að koma með slakar sendingar og lítið að koma sér í færi.
Dómarinn - 8
Arnar og hans teymi stóðu sig bara ágætlega í þessum leik. Það var þó nokkuð af vítaköllum sem var held ég réttlætanlega ekki dæmt, svo lét hann leikinn fljóta mjög vel og var lítið að blása í flautuna. Það er eiginlega bara þetta olnbogaskot í Gumma Magg sem dregur hann niður fyrir mér og örfá önnur smáatriði.