Rosalegum leik lokið! Maður gat varla andað síðustu mínúturnar, svo mikill var hamagangurinn.

Breiðablik tekur öll þrjú stigin úr Vesturbænum.

2107 í stúkunni, vel gert!

Sex mínútum bætt við samkvæmt útsendingu Stöð 2 Sport, missti af því sjálfur.

Eyþór Aron fellur við og KR fær víti.

Ég var að segja að Jason væri að innsigla sigurinn...

KR fær horn.

Wöhler á skot í kjölfar hornspyrnunnar en það fer framhjá.

Axel Óskar með tilraun sem fer framhjá, ekki mikil hætta.

Benoný fellur við inn á teig Breiðabliks en Arnar veifar að það sé ekkert á það. Er sammála Arnari þarna. Benoný var í baráttunni við Damir.

Rúrik Gunnarsson aðeins utan vallar að fá aðhlynningu. Á meðan átti KR aukaspyrnu sem Ægir Jarl sýndist mér komst í en skallinn hans rúllaði aftur fyrir.

Axel Óskar brýtur á Arnóri Gauta eftir miðjuna og Arnór Gauti liggur eftir. Axel allavega baðst afsökunar svo ég geri ráð fyrir að hann hafi verið sá brotlegi.

Jason Daði liggur eftir í teig KR. Hann á skot sem fer yfir, Axel Óskar var í honum og fór er virtist eitthvað í fótinn á honum. Jason þarf aðhlynningu. Blikar fá horn.

Arnór Gauti dæmdur brotlegur gegn Benoný. Fínt færi fyrir KR.

Kiddi Steind?os fær aðhlynningu.

Eyþór Aron Wöhler er að gera sig kláran!

Fínn bolti frá Aroni Þórði inn á teiginn. Sýndist það vera Benjamin Stokke sem skallar boltann yfir og KR á því horn.

Kom ekkert upp úr horninu í kjölfarið.

Kiddi Steindórs brýtur á Aroni Þórði og KR á aukaspyrnu á hættulegum stað.

Aron Bjarna fær sendingu inn á teiginn og kemst í boltann, pikkar honum í átt að marki KR en Guy Smit sér við honum.

Atli Sigurjóns með skot sem Anton Ari ver vel, mjög gott skot. Aron Þórður á svo tilraun stuttu seinna sem fer framhjá.

Afleit hornspyrna hjá Atla Sig, algjörlega mislukkað.

Blikar sækja upp hægri kantinn, boltinn á Höskuld í teignum og hann á skot á nærstöngina en Guy er vel staðsettur og slær boltann í burtu.

Stokke fær boltann inn á teignum, lætur vaða en Axel Óskar kemst fyrir. Flott spil hjá Blikunum í aðdragandanum.

Blikar fá horn, Höskuldur með boltann fyrir og það er laus bolti við markteiginn. Fyrst er tilraun í varnarmann og svo er þrumuskot yfir, Aron með báðar tilraunirnar.

Engar breytingar

Markalaust í leikhléi. Verið meiri fótbolti en ég bjóst við fyrirfram.

45+3

Flott föst fyrirgjöf frá Kidda Jóns inn á teiginn og Jason með vel tímasett hlaup á móti bolta. Jason kemst í boltann en er óheppinn og stýrir honum rétt framhjá nærstönginni.

45+1

Þremur mínutum bætt við.

Aron Bjarnason með frábæran sprett og kemur sér í skotfæri en skotið fer í Finn Tómas inn á teignum, mjög lagleg tilþrif í aðdrangandanum.

Fær boltann við vítateig KR, setur boltann fyrir hægri fótinn á sér og reynir að smyrja boltann upp í hornið. Boltinn rétt yfir!

Benoný rétt missir af boltanum í frábærri stöðu, nær svo til hans og vinnur hornspyrnur.

Síðustu mínútur á undan fengu bæði lið hornspyrnur en ekkert kom úr þeim.

Aron Bjarnason í fínasta færi en hittir ekki markið. Þetta var eiginlega dauðafæri.

Hætta inn á Blikateignum en flaggið fer á loft.

Hinu megin á Rúrik flotta tæklingu gegn Kidda Jóns þegar sá síðarnefndi reynir að koma sér í fyrirgjafarstöðu.

Blikar byrja að styðja sitt lið og því fagna KR-ingar og yfirgnæfa svo gestina í stúkunni.

ÞHöskuldur með fyrirgjöf á Jason sem nær að taka boltann niður í teignum en skotið fer svo beint á Guy Smit.

Skömminn er hjá Reykjavikurborg að vera ekki búin að henda í alvöru völl fyrir sigursælasta félag landsins en Reykjavik hefur verið slétt sama um íþróttir mjög lengi svo kemur manni 0 á óvart.

— Hrafnkell Freyr Àgústsson (@hrafnkellfreyr) April 28, 2024

Alexander Helgi að gera sig líklegan í að fá gult í leiknum. Fengið tiltal og verið hársbreidd frá því að brjóta nokkrum sinnum.

Aukaspyrna og boltinn inn á KR teiginn. Damir ætlaði sér að gera eitthvað annað en að skalla beint aftur fyrir, eitthvað truflaði hann.

Arnar Þór Stefánsson tekur við flautunni!

Aron Kristófer lætur vaða fyrir utan teig en skotið fer yfir.

Luke Rae með skot sem fer vel yfir, hitti boltann illa á lofti.

KR fær hornspyrnu. Aron Þórður tekur spyrnuna en boltinn beint í hendurnar á Antoni Ara.

Dóri Árna er mjög ósáttur og lætur menn heyra það fyrir að sjá þetta ekki. Aron Kristófer stígur aðeins fyrir Jason sem var á sprettinum.

Aron Þórður með hornspyrnuna, finnur Alex sem er í fínu færi inn á teignum en tilraunin rétt framhjá!

Luke Rae lætur vaða af löngu færi, boltinn skoppar og Anton Ari ver boltann til hliðar og aftur fyrir.

Aron Bjarnason fær boltann á fjærstönginni eftir fyrirgjöf Höskuldar en hittir boltann illa og aldrei nein hætta þarna.

Lífleg mínúta, Jason hirðir upp boltann eftir lélega sendingu Benonýs en Axel gerir vel og stoppar Jason á sprettinum.

Aron Kristófer brunar upp. Luke Rae á svo fyrirgjöf en Blikar koma boltanum í burtu.

Benjamin Stokke fyrstur á lausan bolta í teignum og lyftir boltanum inn á markteiginn þar sem Jason sneiðir boltann með höfðinu en skallinn fer rétt yfir markið.

Hörkugóð stemning til þessa. KR-ingar láta vel í sér heyra og taka lögin sín eitt af öðru.

Aron Þórður með spyrnuna inn á teiginn, set smá spurningarmerki við spyrnumannsvalið hélt að Aron Kristófer fengi að láta vaða úr þessari töðu... Boltinn fer á Axel Óskar sem skallar framhjá.

Anton
Höskuldur - Damir - Viktor Örn - Kiddi Jóns
Viktor - Alexander - Kiddi Steindórs
Jason - Stokke - Aron

Smit
Rúrik - Finnur - Axel - Aron Kristófer
Ægir - Alex
Atli - Aron Þórður - Luke Rae
Benoný

Kiddi Jóns með fyrstu tilraun, lætur vaða með hægri fata en skotið beint í varnarmann og Smit hirðir upp boltann.

KR-ingar er í nýju treyjunum sínum, allir í langerma. Blikar eru í sínum hefðbundnu grænu treyjum.

KR í ekkert eðlilega flottum búningum

— Einar Guðnason (@EinarGudna) April 28, 2024

Það stefnir í mjög þéttsettna stúku hér í kvöld. Löng röð inn í stúkuna.

Gregg Ryder sagði í viðtali við Stöð 2 Sport fyrir leik að Kristján Flóki væri veikur og væri því ekki með í dag.

Það er glampandi sól og nánast logn í Vesturbænum. Toppaðstæður til að skella sér á völlinn og horfa á stórleik.

Við komu á Meistaravelli sé ég völlinn. Það má segja að hann líti vægast sagt illa út. Hann er grænn á köflum en stór svæði líta illa út.

Liðin eru bæði með sex stig fyrir leikinn í dag.

Gregg Ryder, þjálfari KR, gerir þrjár breytingar á liði sínu frá leiknum gegn Fram. Rúrik kemur inn fyrir Jóhannes Kristinn Bjarnason sem meiddist í þeim leik og þeir Aron Þórður og Benóný Breki koma inn fyrir Theodór Elmar Bjarnason og Kristján Flóka Finnbogason sem ekki eru í hóp í dag. Þeir Moutaz Neffati, Birgir Steinn Styrmisson og Stefán Árni Geirsson koma inn á bekkinn. Stefán var á bekknum gegn KÁ í bikarnum en kom ekki inn á. Leikurinn í dag er fyrsti byrjunarliðsleikur hægri bakvarðarins Rúriks í Bestu deildinni.

Það eru tvær breytingar á liði Breiðabliks frá leiknum gegn Víkingi. Halldór Árnason setur Kristin Jónsson og Kristin Steindórsson inn í liðið. Þeir Kristófer Ingi Kristinsson og Andri Rafn Yeoman detta út og hvorugur þeirra er í hóp. Tumi Fannar Gunnarsson kemur inn á bekkinn. Kristinn Jónsson er að mæta sínum fyrrum liðsfélögum í KR en hann skipti frá KR aftur til Blika í vetur.

Kristófer Ingi virtist meiðast á læri í leik Breiðabliks gegn Keflavík. Kristófer kom inn á í hálfleik skoraði eina mark Blika í leiknum en þurfti að fara af velli strax í kjölfarið. Vonandi eru meiðsli hann ekki alvarleg.

Albert Brynjar Ingason, sérfræðingur í Stúkunni og þáttarstjórnandi Gula Spjaldsins, spáir í leiki umferðarinnar.

KR 1 - 1 Breiðablik
Fyrsti leikurinn á Meistaravöllum á þessu tímabili og leikurinn verður eftir því, KR komast yfir snemma leiks en Guy Smit gefur víti í seinni hálfleik og Höskuldur tryggir Blikunum punkt.

Eyþór Aron Wöhler var keyptur til KR frá Breiðabliki á dögunum.

,,Ég er búinn að gjóa augunum á þann leik, það er leikur sem kitlar mig aðeins. Ég mæti dýrvitlaus í þann leik, ekki spurning um það. Það verður helvíti gaman að mæta Blikunum aftur og taka í spaðann á mönnum," sagði Eyþór aðspurður um hvernig það yrði að mæta Blikum.

Jóhannes Kristinn Bjarnason, hægri bakvörður KR, brotnaði í leik KR gegn Fram og verður frá í þrjá mánuði. KR fékk inn leikmann frá Norrköping á láni sem líklega mun spila í hægri bakverðinum.

Bæði lið töpuðu í síðustu umferð en voru fyrir það með fullt hús stiga. Breiðablik tapaði gegn Víkingi og KR tapaði gegn Fram í Laugardalnum.

Áður en Gregg Ryder tók við sem þjálfari KR var Halldór Árnason, þjálfari Breiðabliks, orðaður við starfið. Dóri er uppalinn KR-ingur.

Í vikunni var spilað í bikarnum. KR lagði 4. deildarliðið KÁ í 32-liða úrslitum Mjólkurbikarsins, 2-9 lokatölur. KR mætir Stjörnunni á útivelli í 16-liða úrslitunum.

Breiðablik tapaði hins vegar 2-1 á móti Keflavík og er úr leik í keppninni.

Honum til aðstoðar eru þeir Þórður Arnar Arnarson og Guðmundur Ingi Bjarnason. Gylfi Þór Orrason er eftirlitsmaður KSÍ og Arnar Þór Stefánsson er fjórði dómari.

Góðan daginn lesendur góðir og veriði velkomnir í beina textalýsingu frá viðureign KR og Breiðabliks í 4. umferð Bestu deildarinnar. Leikurinn er síðasti leikur dagsins í deildinni.

Þetta verður fyrsti grasleikurinn í sumar og verður fróðlegt að sjá hvernig menn ná að fóta sig á Meistaravöllum í dag.