SKÝRSLAN: Víkingur er alltaf Víkingur í bikarnum
Hvað réði úrslitum?
Grindavík vörðust vel lágt á vellinum og Víkingar náðu fyrir vikið ekki að skapa sér mörg færi. Undir lok leiks stigu Grindvíkingar hærra upp á völlinn og Víkingar refsuðu. Grindavík geta verið stoltir af frammistöðu sinni en gæðin hjá Víkingum skinu í gegn og kláruðu leikinn.
Bestu leikmenn
1. Danijel Dejan Djuric
Danijel er með gæði og fleira, braut ísinn fyrir Víkinga og ógnaði mikið í leiknum. Skoraði einnig gott mark sem var réttilega dæmt af vegna rangstöðu.
2. Josip Krznaric
Króatinn geðugi var flottur á miðju Grindavíkur, var nálægt því að skora í fyrri hálfleik og skoraði svo gott mark í þeim seinni.
Annars erfitt að velja einhverja tvo sem stóðu sérstaklega upp úr.
Atvikið
Mark Valdimars Þórs var af dýrari gerðinni, smurði honum í vinkilinn og gerði út um leikinn.
Hvað þýða úrslitin?
Víkingar verða í pottinum þegar dregið verður í 8- liða úrslit Mjólkurbikarsins.
Vondur dagur
Aron Dagur Birnuson missti boltann undir sig í fyrsta marki leiksins og þar af leiðandi þurftu Grindvíkingar að elta allan leikinn eftir þau mistök.
Dómarinn - 8
Arnar Þór Stefánsson og félagar með fínasta leik. Eitt atvik þar sem ég hefði viljað sjá aukaspyrnu boltinn fór greinilega í hendina á varnarmanni eftir skot að marki. Annars engin stór vafaatriði.