SKÝRSLAN: Pálmi setur KR í skotgrafirnar sem skilar stigi
Hvað réði úrslitum?
Víkingar voru með öll völd á leiknum í fyrri hálfleik fram að því að Halldór Smári fær höfuðhögg. Þá er leikurinn stöðvaður í 6 mínútur á meðan það er verið að búa um skurðinn sem hann fékk. Eftir þessa pásu koma KR-ingar endurnærðir inn í leikinn og eru fljótir að skora jöfnunarmarkið. Seinni hálfleikurinn var svo mikið þannig að Víkingar voru með boltan, að reyna að búa til færi en það gekk erfiðlega gegn lágvörn KR, og KR-ingar áttu nokkur fín færi með skyndisóknum. Ekki komu þó fleiri mörk og jafntefli niðurstaðan.
Bestu leikmenn
1. Axel Óskar Andrésson (KR)
Axel var frábær í dag þar sem hans hlutverk var mest megnis bara að koma boltanum frá eigin marki. Ég er ekki með tölu á hvað hann skallaði marga bolta úr eigin teig eða stöðvaði margar sóknir. Þetta er hafsentinn sem KR-ingar voru svo spenntir yfir þegar hann skrifaði undir hjá þeim í vor.
2. Guy Smit (KR)
Guy hefur fengið alveg haug af gagnrýni á þessu tímabili og bara frekar verðskuldað. Hann var hinsvegar frábær í þessum leik og þá sérstaklega fyrri hálfleik. Víkingar hefðu getað verið búnir að gera út um leikinn eftir 30 mínútur en Guy hélt þeim inn í þessu sem skilaði þessu stigi.
Atvikið
Höfuðhöggið sem Halldór Smári fær er einfaldlega bara vendipunkturinn í þessum leik. Kristján Flóki fer hátt með fótinn og fær gult fyrir hættuspark en fóturinn á honum fer í ennið á Halldóri í leiðinni. Það verður 6 mínútna pása og eftir það jafna KR og Víkingar virka bara vankaðir allir saman restina af fyrri hálfleiknum.
Hvað þýða úrslitin?
Víkingar eru enn í efsta sætinu en Breiðablik er aðeins tveimur stigum á eftir þeim og spila sinn leik í þessari umferð á morgun. Þeir gætu því með sigri farið upp fyrir þá. KR er enn í 9. sæti en gæti sterkt stig gegn Íslandsmeisturunum þýtt það að Pálmi Rafn sé líklegri að taka við til frambúðar hjá KR?
Vondur dagur
Færanýting Víkinga. Það er yfirleitt ekki vandamál fyrir Íslandsmeistarana en í dag þá náðu þeir ekki að klára færin sín í fyrri hálfleik og í seinni hálfleik gekk ill að búa til dauðafærin.
Dómarinn - 6
Helgi Mikael og hans teymi áttu ágætan dag fyrir utan eitt. Það sem dregur þá niður er atvik í fyrri hálfleik þar sem Axel Óskar setur báðar hendur á Erling Agnarsson inn í teig sem er að gera sig tilbúinn að skjóta. Erlingur fellur við en Helgi dæmir ekkert. Að mínu mati hefði þetta átt að vera víti og rautt spjald sem hefði náttúrulega breytt leiknum töluvert.