SKÝRSLAN: Svona gerist þegar þú vilt ekki spila fótboltaleik
Hvað réði úrslitum?
KR byrjaði leikinn frábærlega og hafði maður miklar áhyggjur af HK fyrstu 20 mínúturnar. En eftir því sem leið á leikinn náðu HK-ingar að koma sér betur í takt við leikinn og ná að setja pressu á KR. Í stöðunni 0-2 bjóst þó enginn við endurkomu. Eftir að HK minnkaði muninn í 1-2 urðu KR-ingar hræddir og ætluðu að verja stöðu sína. HK-ingar mun grimmari í alla bolta og skilaði það sér á endanum í mögnuðum sigri. Ótrúlegt að eitt mark geti slegið KR-inga svona mikið út af laginu.
Bestu leikmenn
1. Eiður Gauti Sæbjörnsson
Eiður magnaður í dag, frábær slúttari og kláraði vel í báðum mörkunum sínum. Ógnaði þrennunni en lét tvö mörk duga.
2. Ívar Örn Jónsson
Ívar flottur bæði varnarlega og sóknarlega í dag. Átti frábæra stoðsendingu á Eið Gauta í öðru marki HK.
Atvikið
KR skoruðu mark í stöðunni 2-2, KR-ingar fögnuðu vel og innilega áður en að Sigurður Hjörtur dæmir á bakhrindingu eftir að hafa hugsað sig vel og lengi um. Þetta fannst mér ekki vera réttur dómur og fellur svolítið í skuggann á magnaða afreki HK að koma til baka.
Hvað þýða úrslitin?
KR er í 9. sæti aðeins einu stigi fyrir ofan fallsæti.
HK var í fallsæti fyrir leik en náðu með sigri að jafna Vestra á stigum en með lakari markatölu og eru því í 11. sæti deildarinnar.
Það er ljóst að við fáum alvöru fallbaráttu.
Vondur dagur
Greinilegt að leikmenn KR eru með lítið sjálfstraust. Eftir að hafa spilað frábæran fótbolta í fyrri hálfleik hrundi leikur liðsins eftir að HK minnkuðu muninn. Því verð ég að setja þetta sérstaklega á varnarlínu og miðju liðsins sem lentu undir í nánast öllum návígum í seinni hálfleik.
Dómarinn - 3
Sigurður Hjörtur dæmir bakhrindingu á Atla Sigurjóns er KR skoruðu mark í stöðunni 2-2 sem var bara rangur dómur að mínu mati, Atli einfaldlega vinnur skallabaráttuna eins og ég sé þetta.