SKÝRSLAN: Fjörugt er Keflavík féll
Hvað réði úrslitum?
Taugar Keflavíkur eða sú staðreynd að Stjarnan hafði að engu að keppa? Er svo sem ekki með svarið á hreinu en það má vel velta því fyrir sér. Aðstæður höfðu sömuleiðis áhrif en talsverður vindur var á vellinum sem hafði mikil áhrif á boltann. En mörkin komu í röðum og þeir örfáu áhorfendur sem á leikinn mættu á sjálfri Ljósanótt fengu eitthvað fyrir sinn snúð.
Bestu leikmenn
1. Melanie Claire
Þrenna og nýtti sín færi vel. Var ógnandi og nýtti sér mistök Stjörnunar til hins ítrasta.
2. Úlfa Dís Kreye Úlfarsdóttir
Úlfa Dís tekur þetta fyrir mörkin sem hún skoraði. Það síðara var sérlega glæsilegt.
Atvikið
Jóhannes Karl Sigursteinsson þjálfari Stjörnunnar fékk væna byltu í síðari hálfleik þegar hann ætlaði að aðstoða við að koma boltanum hratt í leik. Vatnsbrúsagrind flæktist þá fyrir honum við verkið og fékk hann flugferð fyrir vikið.
Hvað þýða úrslitin?
Úrslitin í Keflavík sem og á Sauðárkróki þýða það einfaldlega að keppni í neðri hluta Bestu deildar kvenna er einfaldlega lokið. Keflavík og Fylkir fallið á meðan að Stjarnan og Tindastóll halda sætum sínum. Það verður því aðeins leikið um stolt í lokaumferð deildarinnar.
Vondur dagur
Varnarlínur liðanna voru ekki beint stöðugar í dag eins og markaskorið kannski segir. En það er alltaf vont að falla og verður þetta því að teljast vondur dagur fyrir Keflavík sem félag hvað kvennaliðið snertir.
Dómarinn - 7
Bara nokkuð þægilegt hjá Bríeti og hennar teymi í dag. Engu við það að bæta.