SKÝRSLAN: Stórkostlegur sigur FH gegn Breiðabliki
Hvað réði úrslitum?
Vörn FH inga réði úrslitum hér í kvöld og þær sönnuðu það að leikurinn á móti Þrótti var bara slys. Bæði lið fengu færi en heilt yfir fékk FH hættulegri og betri færi og það er fyrst og fremst vörninni að þakka. Það segir ýmislegt þegar langbesta sóknarlið deildarinnar með vel yfir 4 mörk að meðaltali skori bara eitt mark í kvöld. Stelpurnar í FH vildu þetta bara aðeins meira og unnu flesta 50-50 bolta og það skilaði þeim sanngjarnan sigur hér í kvöld.
Bestu leikmenn
1. Birna Kristín Björnsdóttir
Hljóp úr sér lungun sem djúpliggjandi á miðjunni og tengdi vel saman vörn og sókn. Skilaðu góðu dagsverki bæði varnarlega og sóknarlega. Var nýlega valin í U23 ára landsliðið og frammistaðan hér í kvöld sannar að hún eigi heima þar.
2. Arna Eiríksdóttir
Rosalega vanmetin og mér finnst ekki nægilega mikið verið að tala um hana í sumar. Eins og alltaf þá var fyrirliðinn eins og klettur í vörninni og stöðvaði ótal margar sóknir Breiðabliks hér í kvöld. Ég man ekki eftir skallaeinvígi í sumar sem Arna hefur ekki unnið enda býr hún yfir gríðarlegum sprengikrafti. Hlýtur að vera að gera tilkall í A landsliðið.
Atvikið
Það mun vera markið hennar Ídu sem hún afgreiðir með hælnum án þess að hugsa. Birna á góða sendingu á Thelmu sem keyrir á Kristínu og býr til plássið fyrir senindinguna sem Ída Marín klára eins og Ronaldo.
Hvað þýða úrslitin?
Úrslitin þýða að FH tillir sér aftur á toppinn með jafnmörg stig og Breiðablik. FH stelpurnar ætla að blanda sér í toppbaráttuna og sýndu það að síðasta umferð var bara frávik en ekki venja.
Fyrir Breiðablik er fyrsti tapleikur sumarsins staðfestur. Toppliðið fyrir þessa umferð var með meira en 4 mörk að meðaltali í leik í sumar en náðu bara einu inni hér í kvöld.
Það eru talverðar líkur að Breiðablik gefi eftir toppsætið ef Þróttur nær stigi á móti botnliði FHL á morgun
Vondur dagur
Það átti engin leikmaður vondan leik hér í kvöld og þetta var virkilega flottur og skemmtilegur leikur að horfa á. Bæði liðin áttu sína kafla í þessum leik en þó FH með aðeins fleiri kafla og aðeins betri færi.
Mér finnst leiðinlegt að segja það en dómarinn átti ekki góðan leik að mínu mati.
Dómarinn - 4
Margir furðurlegir dómar og í raun hefðu gulu spjöldin átt að vera fleiri. Það vantar algjörlega samræmi í dómgæsluna hjá Jovani. Besta dæmið í kvöld var þegar Heiða Ragney heldur í Mayu með báðum höndum til að stöðva sókn og ekkert gult. Einni mínútu síðar fékk Samantha gult fyrir nákvæmlega sama brotið.