Það er rosalega erfitt að lenda undir gegn ÍR á þeirra heimavelli. Þeir elska að vera pirrandi og leiðinlegir, ef svo má að orði komast, og það á bara að vera einkenni ÍR. Það passar einhvern veginn svo vel. ÍR-ingar náðu forystunni í dag og voru sterkir varnarlega eftir það. Leiknir fékk sín færi í seinni hálfleik en þetta datt með heimamönnum og þeir lönduðu sterkum sigri.

Það er auðvitað bara markið sem Óðinn skorar eftir hornspyrnu. Föstu leikatriðin eru sterk hjá ÍR-ingum og þeir nýttu þarna hornspyrnu vel. Maður fékk það á tilfinninguna eftir markið að það yrði erfitt fyrir Leikni að komast aftur inn í leikinn, þó þeir hafi fengið sín færi.

ÍR er á toppnum! Ég held að það hafi ekki margir giskað á það fyrir mót að ÍR yrði á toppnum á þessum tímapunkti. Þeir misstu marga af lykilmönnum sínum í Bestu deildina eftir síðasta tímabil en þeir hafa búið til sterkt lið með sterk einkenni. ÍR er á mjög góðum stað og stuðningsmenn geta leyft sér að dreyma. Eftir tvo sigurleiki í röð kom tap hjá Leikni í kvöld en það eru enn fullt af möguleikum fyrir þá enda nóg eftir.

Dagur Ingi Hammer Gunnarsson átti erfiðan dag á skrifstofunni. Komst lítið í takt við leikinn og klúðraði frábæru færi í seinni hálfleiknum. Axel Freyr var ágætur í fyrri hálfleik en var eiginlega ósýnilegur í þeim seinni þar sem Leiknir þurfti á meira á honum að halda.

Arnar dæmdi leikinn ágætlega. Lítil atriði hér og þar sem hægt er að setja athugasemdir við, en bara nokkuð vel dæmt held ég.