SKÝRSLAN: Tveir ólíkir hálfleikir og dramatískar lokamínútur á Skaganum
Hvað réði úrslitum?
Sitt hvor hálfleikurinn réði úrslitum hér í kvöld. Ég man ekki eftir öðru eins í fótboltaleik en fyrri hálfleikur var 100% eign Vals en sá síðari 100% eign Skagamanna. Báðir eignirnar voru skuldlausar þar að auki. Að lokum eru úrslitin 2-2 bara nokkuð sanngjörn.
Bestu leikmenn
1. Haukur Andri Haraldsson
Ég skal glaður viðurkenna að ég hef gagnrýnt Hauk Andra í sumar – og það með réttu, því hann hefur sjálfur viðurkennt að frammistöðurnar hafi verið undir getu. En í dag sýndi hann sitt rétta andlit. Spilaði aðeins seinni hálfleikinn en á því 45 mínútna tímabili gjörbreytti hann leiknum. Var út um allt í seinni og steig ekki feilspor. Ef þessi útgáfa af Hauki heldur áfram, þá getur Skaginn farið að brosa – því þeir þurfa á honum að halda.
2. Jónatan Ingi Jónsson
Var langbesti maðurinn í fyrri hálfleik og bjó til bæði færin. Lagði upp sögulegt mark á Patrick Pedersen og fiskaði vítið. Mér finnst erfitt að ekki setja Pedersen á blað hér í kvöld en hinir tveir voru einfaldlega betri.
Atvikið
Það hlýtur að vera jöfnunarmarkið sem stendur upp úr – og óhætt er að segja að heppnin hafi verið með Ómari og Skaganum. Á 93. mínútu kemur hár bolti inn í teiginn og hvort sem Ómar ætlaði sér að nota öxlina eða ekki, þá gerði hann það 15 metrum frá markinu – og vippaði boltanum lygilega yfir Schram og jafnar. Ótrúlegt mark á ótrúlegum tíma.
Hvað þýða úrslitin?
Valsmenn ná að auka forskotið á toppnum – en aðeins um eitt stig. Þeir eru nú með tveggja stiga forystu á Breiðablik og Víking, en gætu tapað toppsætinu ef þeir falla gegn Blikum í næstu umferð. Fyrir ÍA er þetta jafntefli þó merki um sterkan karakter – að koma til baka úr 0–2 undir gegn toppliði er virkilega öflugt. Því miður skilar þetta eina stig þó líklega litlu fyrir Skagamenn sem sitja ennþá í neðsta sæti.
Vondur dagur
Jonas Gemmer fær þetta skuldlaust í dag. Miðað við spilamennskuna hans í kvöld þá finnst mér hann varla eiga heima í Lengjudeildinni. Hann var ekki lélegur heldur ógeðslega lélegur. Ekki taka mig bara á orðinu heldur sjáið hvað Lárus Orri gerir í hlénu, tekur hann út af og leikurinn gjörbreytist.
Ég ætla að vona að Jonas Gemmer hafi átti einstaklega vondan dag því ef svo er ekki þá þarf Skaginn einfaldlega að segja "Gemmer ekki meira"
Dómarinn - 7
Það má finna einstaka atvik sem hægt er að setja spurningarmerki við, en heilt yfir var Gunnar Freyr og hans teymi með góð tök á leiknum. Hann notaði gula spjaldið af skynsemi til að halda stjórn á leiknum – sem er einmitt tilgangurinn með því