SKÝRSLAN: Keflavík lagar markatöluna í baráttu um að komast í umspilið
Hvað réði úrslitum?
Stórfurðulegur og skemmtilegur fótboltaleikur. Keflavík byrjaði af krafti og skoraði fyrstu tvö mörk leiksins. Leikurinn sveiflaðist svo til Völsungs sem tóku þá öll völd á vellinum og náðu að minnka muninn. Keflavík skorar svo þriðja markið fyrir hlé sem gaf þeim mikið. Heimamenn skora svo beint úr horni á fyrstu mínútu seinni hálfleiks og eftir það var leikurinn aldrei í neinni hættu og Keflvíkingar kláruðu dæmið.
Bestu leikmenn
1. Muhamed Alghoul
Var frábær fyrir heimamenn í dag. Skoraði tvö mörk og var alltaf til vandræða framarlega.
2. Stefan Ljubicic
Skoraði langþráð mark og fær sætið hér fyrir það. Var í færunum í dag og átti markið sitt svo innilega skilið.
Atvikið
Þriðja mark Keflavíkur þegar Ásgeir Páll ætlar að koma með fyrirgjöf fyrir markið frá vinsti en boltinn svífur bara í bláhornið fjær. Mómentið var með Völsungi þegar þetta gerist og gaf Keflavík mikið fyrir hálfleikinn.
Hvað þýða úrslitin?
Keflavík lagar markatöluna í 6.sætinu og eru bara þremur stigum á eftir ÍR og HK í 5.-4.sæti og mæta ÍR einmitt í næstu umferð. Völsungur eru þremur stigum frá fallsæti í 7.sæti og mæta Grindavík í næstu umferð sem eru stigi á eftir þeim í 8.sæti.
Vondur dagur
Varnarleikur Völsungs horfði sjö sinnum á eftir boltanum í netinu. Ívar Arnbro átti nokkrar góðar vörslur sem komu í veg fyrir stærra tap en heilt yfir var þetta ekki spes frammistaða aftast eins og úrslitin gefa til kynna.
Dómarinn - 6
Þokkalegasta frammistaða í dag. Völsungur vildi fá peysutog í aðdraganda þriðja marksins þegar Kári Sigfússon rífur klárlega í treyju leikmanns Völsungs þegar Keflavík vinnur boltann aftur. Ef það er tekið út fyrir sviga þá var þetta bara fínasta frammistaða. Ekki slæmt en ekki frábært heldur.