SKÝRSLAN: FH gulltryggðir í efri hlutann - Framarar þurfa að treysta á Breiðablik
Hvað réði úrslitum?
Leikurinn endar með jafntefli sem var kannski á endanum nokkuð sanngjörn niðurstaða. En það voru skiptingar Heimis Guðjónssonar sem gerðu það að verkum að FH-ingar hafi náð að skora tvö mörk á þriggja mínútna kafla.
Bestu leikmenn
1. Bjarni Guðjón Brynjólfsson
Kom óvænt frábærlega inn í leikinn. Var búinn að skora og leggja upp mark eftir að hafa verið inn á í sjö mínútur.
2. Israel Garcia
Frábært mark hjá honum í dag fyrir utan teig og átti svo annað skot sem var ekkert svo langt frá því að enda inni.
Atvikið
Þegar Sigurjón Rúnarsson jafnaði leikinn á lokamínútum leiksins. Þetta gæti verið mikilvægasta mark tímabilsins hjá Fram, ef ÍBV nær ekki í úrslit á morgun gegn Breiðabliki.
Hvað þýða úrslitin?
Úrslitin þýða að FH-ingar eru nú gulltryggðir í efri hlutann en þeir sitja í fimmta sæti með 30 stig. Fram er rétt á eftir með 29 stig og eru sem stendur í seinasta sæti efri hlutans. Hins vegar ef ÍBV vinnur Breiðablik á heimavelli á morgun, þá dettur Fram niður í neðri hlutann.
Vondur dagur
Þennan titil hlýtur Jóhann Ægir Arnarsson alveg skuldlaust. Hann var búinn að vera inn á vellinum í tvær mínútur, þegar hann fékk að líta rauða spjaldið. Það má alveg deila um það hvort þetta hafi verið sanngjarn dómur en engu að síður heimskuleg tækling.
Dómarinn - 7
Það má deila um frammistöðu Vilhjálms Alvars í þessum leik en heilt yfir var þetta fínt hjá honum.