SKÝRSLAN: Súrsæt tilfinning á Brekkunni
Hvað réði úrslitum?
Vestri byrjaði leikinn ágætlega en KA komst yfir. Vestri jafnaði metin í seinni hálfleik en KA tók yfir leikinn í kjölfarið og vann sannfærandi sigur.
Bestu leikmenn
1. Hallgrímur Mar Steingrímsson
Hallgrímur frábær í dag. Skorar tvennu og leggur upp eitt. Hefði hæglega getað gert enn betur.
2. Birnir Snær Ingason
Birnir skoraði annan leikinn í röð. Var mjög flottur í dag og eins og með Grímsa þá hefði Birnir getað skapað enn meira.
Atvikið
Súrsætur sigur fyrir KA. Liðið var hársbreidd frá því að eiga möguleika á að komast upp í efri hlutann en liðið frétti af því í þann mund sem leiknum var að ljúka að Fram hafði jafnað gegn FH sem gerði út um vonir liðsins. Liðið mun því reyna vinna Forsetabikarinn þriðja árið í röð.
Hvað þýða úrslitin?
Jöfnunarmark Fram á 92. mínútu gegn FH þýðir að KA nær ekki upp í efri hlutann. Vestri er einnig í neðri hlutanum.
Vondur dagur
Vestraliðið var óþekkjanlegt í dag. Baráttan sem liðið er þekkt fyrir var ekki till staðar, gríðarleg vonbrigði fyrir liðið sem hefur heilt yfir verið flott í sumar.
Dómarinn - 8
Það var nóg að gera hjá dómarateyminu í dag. Tvö víti dæmd sem voru bæði rétt. Bæði lið vildu fleiri víti en ég held að Jóhann Ingi Jónsson og félagar hafi verið með þetta allt saman á tæru.