SKÝRSLAN: Veislan heldur áfram á Meistaravöllum og söguleg sókn í uppsiglingu
Hvað réði úrslitum?
Bæði lið mættu grimm til leiks og hlupu úr sér lungun en hlaupageta KR var hreinlega á æðra stigi en hjá FH. Þegar gestirnir voru þreyttir þá voru KR ingar bara rétt að byrja.
Bestu leikmenn
1. Amin Cosic
Það spiluðu fjórir leikmenn FH hægri bakvörð í leiknum. Þar af kom nýr hægri bakvörður í hálfleik og var hann tekinn út af áður en leiknum lauk. Þau orð segja allt sem segja þarf um Amin Cosic hér í kvöld.
2. Arion Sigurðarson
Skoraði tvö mörk og lagði upp eitt, heldur uppteknum hætti áfram og hefur sennilega verið besti leikmaður deildarinnar hingað til. Luke Rae var líka frábær í þessum leik sem og margir aðrir í KR liðinu í dag.
Atvikið
Atvik leiksins er klárlega dómurinn á 18. mínútu leiks og nú eru skiptar skoðanir á þeim dómi. Aron Sigurðarson rífur í Róbert Huga en Arnar dómari beitir hagnaðarreglunni en skömmu seinna tapar FH boltanum og úr því verður hröð sókn sem endar með marki. Jóhannes Karl átti erfitt með að sjá hagnaðinn fyrir sitt lið heldur þvert á móti hefði hann vilja láta dæma aukaspyrnu. En svo var ekki og KR komst í 2-1 og náði forystu sem þeir héldu út restina af leiknum.
Hvað þýða úrslitin?
Úrslitin þýða að veislan heldur áfram hjá KR sem mun áfram sitja á toppi Bestu deildar karla eftir fjórar umferðir og 18 mörk skoruð. FH þarf hins vegar að bíða eftir fyrsta sigrinum í ár og munu ennþá verma 11. sætið.
Vondur dagur
Þessir leikur verður nú seint þekktur fyrir góðan varnarleik enda voru sóknir beggja liða góðar og þá sérstaklega í fyrri hálfleik. En að því sögðu þá var vörnin hjá FH ansi skrautleg á köflum og þá sérstaklega hægri bakvarðarstaðan. Þannig að hægri bakvarðarstaðan hjá FH fær þetta í kvöld enda léku fjórir leikmenn í henni í kvöld og enginn þeirra réði við Amin Cosic.
Dómarinn - 5
Þetta var erfiður leikur að dæma sökum miklum hraða, blautu gervigrasi og roki. Og alveg hægt að benda á nokkra dóma í leiknum sem hefði líklegast átt að dæma með öðrum hætti en að því sögðu þá hef ég séð mun verri dómgæslu. Gef Arnari fimmu fyrir frammistöðuna í heild.