Lengjudeildin: Grótta gerði góða ferð á Ísafjörð

Grótta vann annan deildarleikinn í röð þegar liðið lagði Vestra að velli, 3-0, á Kerecis-vellinum á Ísafirði í Lengjudeild karla í dag.

Gestirnir brutu ísinn áður en mínúta var liðin. Björgvin Brimi Andrésson komst í góða fyrirgjafarstöðu og sendi boltann fyrir á Kristófer Dan Þórðarson sem skallaði hann í hægra hornið.

Jafnræði var með liðunum næstu mínúturnar. Vestramenn komu sér í ágætar stöður en færasköpunin meiri hjá Gróttu.

Þegar um 25 mínútur voru liðnar bætti Grótta við öðru marki. Caden Robert McLagan kom sér á nærstöngina og stangaði hornspyrnu Gríms Inga Jakobssonar í netið.

Staðan var 2-0 í hálfleik en Gróttumenn héldu áfram að skapa sér færi í þeim síðari. Marvin Darri Steinarsson stóð þó fyrir sínu í marki Vestra og varði nokkrum sinnum vel.

Heimamenn vildu tvívegis fá vítaspyrnu. Í fyrra skiptið féll Gunnar Jónas Hauksson í teignum eftir viðskipti við Grím en lítið virtist vera í því. Síðar féll Þórður Gunnar Hafþórsson eftir baráttu við nokkra leikmenn Gróttu, en það atvik var mun óljósara en ekkert dæmt í báðum atvikum.

Fimm mínútum fyrir leikslok gerði Grótta endanlega út um leikinn. Andri Freyr Jónasson vann sig vel inn í vítateig Vestra og fann hinn 16 ára gamla Mattías Kjeld. Hann lék á Marvin og skoraði sitt níunda deildarmark í sumar.

Seltirningar fögnuðu þar með öruggum 3-0 sigri. Þeir eru áfram í sjötta sæti en nú með 25 stig, fjórum meira en Vestri sem er sæti neðar.