Carrick gefur leikmönnum frí eftir leiki

Breytingin var augljós strax í fyrsta leik gegn Man City þar sem Rauðu djöflarnir spiluðu frábærlega og gáfu ekkert eftir til að vinna sannfærandi 2-0 sigur. Leikmönnum liðsins leið vel inni á vellinum og það sást augljóslega á líkamstjáningunni, eitthvað sem hefur vantað uppá á undanförnum árum.

Leikmenn liðsins voru brosandi og það var eins og þungu fargi hefði verið létt af herðum þeirra. Ekki vantaði þó efasemdarraddirnar sem sögðu að Man Utd skilar hvort sem er alltaf frammistöðu gegn Man City og að allt færi aftur í bál og brand í næsta leik gegn Arsenal, en svo varð ekki.

Enskir fjölmiðlar spyrja sig hver ástæðan sé á bakvið þennan viðsnúning, hvernig tókst Carrick að breyta hlutunum svona fljótt? Það eru taldar vera ýmsar ástæður fyrir því og fjallar The Sun um eina þeirra sem er einföld: Carrick gefur leikmönnum hvíld daginn eftir leik.

Hvorki Erik ten Hag né Rúben Amorim gáfu leikmönnum Man Utd hvíld eftir leiki, þess í stað mættu leikmenn á æfingasvæðið til að vinna í endurheimt. Núna fá þeir að vera heima með fjölskyldum sínum í sólarhring áður en þeir mæta aftur til æfinga.