Þýskaland í dag - Ísak spilar við Leipzig og stórleikur í München

Köln er með 23 stig eftir 20 umferðir, aðeins fjórum stigum frá fallsvæðinu. Ísak hefur byrjað á varamannabekknum síðustu tvo leiki í röð en það þykir svo gott sem öruggt að hann mun koma við sögu ef hann byrjar ekki.

Leikurinn í dag verður afar erfiður þar sem gestirnir frá Leipzig eru í harðri baráttu um evrópusæti en hafa verið að misstíga sig að undanförnu.

Eftir að leiknum lýkur í Köln tekur topplið FC Bayern á móti sterku liði Hoffenheim og þarf á sigri að halda eftir vandræðagang síðustu vikna.

Þýskalandsmeistararnir eru búnir að misstíga sig í tveimur deildarleikjum í röð og eru aðeins með þriggja stiga forystu í titilbaráttunni, en þeir eiga leikinn í dag til góða.

Hoffenheim situr í þriðja sæti og er búið að sigra fimm leiki í röð. Níu stig skilja liðin að og má búast við afar spennandi slag.

Leikir dagsins
14:30 Köln - RB Leipzig
16:30 Bayern - Hoffenheim