Hansi Flick: Alveg ruglaður leikur

„Þetta var alveg ruglaður leikur. Besta sem við tökum úr honum er hugarfarið. Ég held að ég hafi aldrei upplifað endurkomu eins og þessa. Varamennirnir hjálpuðu okkur mikið," sagði Hansi Flick eftir leikinn ótrúlega.

Eric García kom inn af bekknum hjá Barcelona og skoraði jöfnunarmark 4-4 í lok leiksins. Enn var tími til að skora sigurmarkið og þegar uppgefinn uppbótartími var liðinn setti Raphinha á sig skikkju og tryggði Börsungum öll stigin.

Leikurinn bauð upp á mikla dramatík en líka mörg stór mistök. Markvörðurinn Wojciech Szczesny gaf Benfica annað mark liðsins og fékk einnig á sig vítaspyrnu.

„Það gera allir mistök. Við vinnum saman og töpum saman. Ég var ánægður með það sem ég fékk frá honum í seinni hálfleik," sagði Flick um frammistöðu Pólverjans.

Barcelona tekur á móti Atalanta í síðasta leik sínum í deildarkeppninni.