England: Aston Villa hafði betur gegn Everton

Nýliðar Aston Villa náðu í sinn fyrstu úrvalsdeildarstig er Everton kom í heimsókn fyrr í kvöld.

Gylfi Þór Sigurðsson var í byrjunarliði Everton en Marco Silva tók hann útaf eftir 62. mínútur til að gera pláss fyrir Alex Iwobi. Þess í stað hélt hann Andre Gomes og Morgan Schneiderlin á miðjunni, sem sköpuðu ótrúlega lítið á Villa Park.

Leikurinn var nokkuð bragðdaufur og einkenndist af harðri baráttu og gæðaleysi á síðasta þriðjungnum. Hvorugt liðið náði að skapa sér mikið af færum en Wesley Moraes skoraði á 21. mínútu eftir góða stungusendingu frá Jota.

Everton komst tvisvar sinnum nálægt því að jafna á lokakaflanum en skot Iwobi fór í stöngina og svo klúðraði Theo Walcott dauðafæri eftir frábæra fyrirgjöf frá Moise Kean.

Gestirnir juku sóknarþungan undir lokin sem varð til þess að Anwar El-Ghazi, sem kom inn af bekknum, tvöfaldaði forystu Villa úr skyndisókn og gulltryggði sigurinn.

Aston Villa er því með þrjú stig eftir þrjár umferðir. Everton er með fjögur stig.