Landsliðsmarkvörðurinn Rúnar Alex Rúnarsson fær ekki mikið af tækifærum með Dijon í frönsku úrvalsdeildinni, en hann spilar í bikarnum.
Rúnar var í markinu í kvöld er Dijon heimsótti í kvöld Limonest úr fimmtu efstu deild Frakklands. Það var hægara sagt en gert hjá franska úrvalsdeildarliðinu að ná í sigurinn, en það tókst að lokum.
Eftir markalausan fyrri hálfleik komst Limonest yfir í byrjun þess seinni. Forystan var hins vegar ekki langlíf þar sem Dijon jafnaði um fimm mínútum síðar.
Það voru hins vegar ekki skoruð fleiri mörk í venjulegum leiktíma og uppbótartíma. Því þurfti að framlengja. Þar náði Dijon að skora sigurmark og kom það í uppbótartímanum.
Lokatölur 2-1 og er Dijon, sem er í 17. sæti frönsku úrvalsdeildarinnar, komið áfram í 8-liða úrslit bikarsins.
Athugasemdir