Góðan daginn! Hér verður bein textalýsing frá fallbaráttuslag Keflavíkur og Þórs í lokaumferð Pepsi-deildarinnar.

Keflvíkingar eru fyrir leikinn í áttunda sæti deildarinnar en Þórsarar eru í því tíunda. Bæði lið hafa 21 stig líkt og Framarar sem eru í níunda sætinu. Öll þessi lið munu halda sæti sínu ef Grindvíkingar tapa gegn ÍBV í Eyjum. Hér að neðan má sjá hvað þarf að gerast ef Þór eða Keflavík á að falla. Keflavík fellur... ...ef liðið tapar, Fram nær stigi og Grindavík vinnur. ...á markatölu ef liðið tapar mjög stórt og Grindavík nær stigi (að því gefnu að Fram tapi ekki líka stórt). Þór fellur... ...ef liðið tapar, Fram nær stigi og Grindavík vinnur. ...ef liðið tapar, Fram tapar ekki stórt og Grindavík vinnur. ...ef liðið gerir jafntefli, Fram nær stigi og Grindavík vinnur. ...á markatölu ef liðið tapar með tveggja marka mun, Fram nær stigi og Grindavík gerir jafntefli. ...á markatölu ef liðið tapar með tveggja marka mun, Fram tapar ekki mjög stórt og Grindavík gerir jafntefli.

Það er talsvert rok á annað markið í Keflavík og völlurinn er rennandi blautur. Krefjandi aðstæður fyrir leikmenn sem munu ekki gefa tommu eftir í dag.

Frans Elvarsson er í leikbanni hjá Keflavík og þá dettur Magnús Þórir Matthíasson út úr liðinu. Magnús Sverrir Þorsteinsson og Viktor Smári Hafsteinsson koma inn í liðið.

Hjá Þórsurum kemur Ármann Pétur Ævarsson inn í liðið fyrir Inga Frey Hilmarsson sem skoraði í síðasta leik gegn Breiðabliki.

Mjölnismenn, stuðningsmenn Þórs, eru mættir á leikinn og stuðningsmannasveit Keflavíkur er einnig á leiðinni. Áhorfendur munu láta vel í sér heyra í stúkunni í dag.

Við minnum þá sem tísta um leikinn að merkja færslurnar #fotbolti. Valdar færslur verða birtar hér í textalýsingunni.

Leikurinn er hafinn! Keflvíkingar leika með vindinn í bakið í fyrri hálfleik.

Guðmundur Steinarsson fær fyrsta færið. Jóhann Birnir Guðmundsson á fyrirgjöf en Guðmundur skallar beint á Srdjan Rajkovic.

Ármann Pétur Ævarsson á ágætis skot en boltinn fer framhjá.

Keflvíkingum nægir jafntefli til að halda sæti sínu í deildinni og þeir eru því komnir í góða stöðu núna.

Það vantar ekki fjörið í Keflavík þessar mínúturnar og Þórsarar eru búnir að taka vel við sér. Aleksandar Linda vinstri bakvörður Þórsara á þrumuskot en Ómar Jóhannsson ver.

Það er sótt á báða bóga og Keflvíkingar gætu auðveldlega verið komnir í 3-1. Hilmar Geir Eiðsson á fyrirgjöf á fjærstöng þar sem Guðmundur Steinarsson er einn og óvaldaður en Srdjan Rajkovic ver skalla hans.

Guðmundur Steinarsson á ágætis skot fyrir utan teig en Srdjan Rajkovic slær boltann til hliðar.

Búið er að flauta til leikhlés og Keflvíkingar leiða 2-1. Þónokkuð jafnræði hefur verið með liðunum en Þórsarar munu nú fá vindinn í bakið í síðari hálfleik. Eins og staðan er núna halda bæði þessi lið sér uppi en Þórsarar eru uppi á fleiri skoruðum mörkum en Grindavik.

Í hálfleik eru 2. flokkur og 4. flokkur C hjá Keflavik heiðraðir. Annar flokkur Keflvíkinga varð bikarmeistari í vikunni en 4. flokkur C varð Íslandsmeistari á dögunum.

Grindvíkingar eru niðri þegar flautað hefur verið til hálfleiks í leikjum fallbaráttunnar. Staðan er markalaus í Vestmannaeyjum en Þórsarar hanga uppi á einu marki sem stendur. Þeir hafa skorað fjórum mörkum meira en Grindavík! Hálfleikur: Fram - Víkingur 1-1 ÍBV - Grindavík 0-0 Keflavík - Þór 2-1 Staðan núna: 8. Keflavík 24 stig (-5) 9. Fram 22 stig (-9) 10. Þór 21 stig (-13) 11. Grindavík 21 stig (-13)

Ármann Pétur Ævarsson fær fínt skallafæri en hann skallar fyrirgjöf Gísla Páls Helgasonar framhjá.

Hellidemba bætist nú ofan á rokið í Keflavik og leikmenn eru ekki öfundsverðir af því að reyna að spila góðan fótbolta í þessu veðri.

Jóhann Helgi Hannesson fær dauðafæri á markteig en hann er of lengi að athafna sig og Guðjón Árni Antoníusson nær að tækla fyrir skotið.

Rólegt er yfir leiknum þessa stundina. Þórsarar sækja meira með vindinn í bakið en Keflvíkingar eiga einnig sínar skyndisóknir. Eitt mark frá Keflvíkingum í viðbót fellir Þórsara eins og staðan er núna.....

Þar sem Framarar eru að vinna Víkinga 2-1 hefur staðan í fallbaráttunni breyst. Þórsarar eru enn að hanga uppi á fleiri mörkum skoruðum en Grindavík en það má lítið út af bregða. Lítur út fyrir að það verði Þór eða Grindavík sem fari niður nema eitthvað mikið breytist. Staðan núna: 8. Keflavík 24 stig (-5) 9. Fram 24 stig (-8) 10. Þór 21 stig (-13) 11. Grindavík 21 stig (-13)

Þórsarar sækja áfram meira og Þorsteinn Ingason fyririði þeirra á skalla framhjá eftir hornspyrnu. Skömmu síðar á Ármann Pétur Ævarsson langskot sem fer beint á Ómar Jóhannsson í markinu.

Magnús Sverrir Þorsteinsson fær ágætis færi eftir gott spil en skot hans fer í hliðarnetið.

Þórsarar eru í mjööög slæmum málum þar sem Grindavík er 2-0 yfir í Vestmannaeyjum! Þvílíkt og annað eins. Þór er á leiðinni niður. Staðan núna (eftir sirka 89 mín): Fram - Víkingur 2-1 ÍBV - Grindavík 0-2 Keflavík - Þór 2-1 Staðan núna: 8. Keflavík 24 stig (-5) 9. Fram 24 stig (-8) 10. Grindavík 23 stig (-11) 11. Þór 21 stig (-13)

Þórsarar eru fallnir! Keflvíkingar halda út en þeir standa af sér þunga pressu Þórsarar undir lokin. Lokatölur 2-1 fyrir Keflavík en það þýðir að Þórsarar leika í fyrstu deild á næsta tímabili. Grátlegt fyrir nýliðana sem hafa ekki verið í fallsæti í margar vikur. Þórsarar munu leika í Evrópudeildinni á næsta ári sem og í fyrstu deildinni. Nánari umfjöllun um leikinn kemur á Fótbolta.net innan tíðar.