SKÝRSLAN: Skagamenn falla á fyrsta prófinu
Hvað réði úrslitum?
ÍBV var einfaldlega miklu betri aðilinn í þessum fótboltaleik. ÍA skapaði sér lítið sem ekkert á meðan Eyjamenn voru léttleikandi, beittu öflugum skyndisóknum, héldu boltanum vel og áttu þeir sigurinn fyllilega skilið.
Bestu leikmenn
1. Aron Bjarnason
Aron átti marga sprettina upp vinstri kantinn í dag. Hann skoraði mark og lagði annað upp en hann hefði hæglega getað búið til fleiri mörk.
2. Derby Rafael Carrilloberdou
Nýji markmaðurinn kemur sterkur inn í liðið hjá ÍBV. Byrjaði allflestar skyndisóknir Eyjamanna með löngu útköstunum sínum eða ekki síðri spörkum og náði meira að segja stoðsendingu með þessu móti.
Atvikið
Fyrsta mark Eyjamanna var stórbrotið. Derby Carillo átti þá langt kast fram völlinn þar sem Sindri Snær var, hann kom boltanum út á Aron Bjarna. Hann gaf boltann fyrir á Simon Smidt á fjærstönginni sem batt endahnútinn á þessa sókn með frábæru viðstöðulausu skoti í þaknetið.
Hvað þýða úrslitin?
ÍBV tyllir sér í toppsætið í bili allavegana. Þessi leikur sendir skýr skilaboð til annarra liða um að lið sem koma á Hásteinsvöll mega eiga von á erfiðum leik. Skagamenn sem voru ekki sannfærandi í dag er ennþá spurningarmerki.
Vondur dagur
Árni Snær í marki Skagamanna gat kannski lítið gert við mörkunum en að fá 4 mörk á sig er alltaf slæmt hvernig sem þú lítur á það.
Dómarinn - 5
Ekki mikið um að vera en mörg óþarfa gul spjöld fóru á loft í dag.