SKÝRSLAN: HK mistókst að slíta sig frá fallbaráttunni
Hvað réði úrslitum?
HK-ingar stjórnuðu ferðinni, sérstaklega í síðari hálfleiknum þar sem þeir sóttu stíft. Fjarðabyggð fékk tvö fín færi til að skora í fyrri hálfleik en í síðari hálfleik var um einstefnu að ræða hjá HK. Vörn Fjarðabyggðar var þétt með miðverðina fremsta í flokki. Það skilaði vængbrotnum gestunum stiginu en nokkra menn vantaði í lið þeirra í dag.
Bestu leikmenn
1. Ingiberg Ólafur Jónsson (Fjarðabyggð)
Blikinn var frábær í vörninni gegn HK. Bjargaði tvívegis marki á ævintýralegan hátt í síðari hálfleiknum.
2. Loic Ondo (Fjarðabyggð)
Ondo hefur átt flott sumar og hann átti góðan leik með Ingiberg í hjarta varnarinnar.
Atvikið
Hákon Ingi Jónsson, framherji HK, var í mikilli baráttu við varnarmenn Fjarðabyggðar í dag. Hann féll í teignum í viðbótartíma og HK-ingar vildu vítaspyrnu. Jóhann Ingi dómari dæmdi hins vegar ekkert við litla hrifningu HK-inga sem mótmæltu grimmt.
Hvað þýða úrslitin?
Fjarðabyggð er í 10. sæti með 16 stig. Huginn er með jafnmörg stig í 11. sæti en Fjarðabyggð er með betri markatölu. HK er síðan í 9. sætinu með 18 stig. HK og Fjarðabyggð eru því bæði í bullandi fallbaráttu í augnablikinu. HK hefði getað stokkið upp í 7. sæti með sigri en það gekk ekki í dag.
Vondur dagur
Hlynur Bjarnason fékk tækifæri í fremstu víglínu Fjarðabyggðar í fjarveru Dimitrov Zelkjo sem var í leikbanni. Hlynur fékk dauðafæri til að skora í fyrri hálfleik en skot hans fór beint á Arnar Frey í markinu. Hlynur hefði getað stimplað sig vel inn með marki en honum brást bogalistin í þetta skipti.
Dómarinn - 6.5
Jóhann Ingi hafði fín tök á leiknum lengst af. Í viðbótartíma vildu HK-ingar fá vítaspyrnu og virtust hafa ýmislegt til síns máls. Jóhann Ingi neitaði hins vegar. Stór ákvörðun.