SKÝRSLAN: Grindvíkingar komust aftur á sigurbrautina gegn ÍA
Hvað réði úrslitum?
Í ótrúlega skemmtilegum leik, þá voru Grindvíkingar einfaldlega hættulegri á síðasta þriðjungi vallarins og fengu fleiri færi til þess að skora mörk. Þrátt fyrir að lenda undir, ekki einu sinni, heldur tvisvar, þá hætti liðið aldrei og var endurkomusigurinn sérstaklega sætur.
Bestu leikmenn
1. Juanma Ortiz
Þvílík innkoma hjá hinum spænska! Kom inn á á 69. mínútu og var strax farinn að narta í varnarmenn ÍA. Fiskaði víti, sem jafnaði leikinn öðru sinni og skoraði svo sjálfur sigurmarkið. Fékk að vísu rautt spjald undir lok leiksins sem var klaufalegt, en innkoma hans skipti sköpum.
2. Alexander Veigar Þórarinsson
Undirritaður hefur gagnrýnt Alexander nokkrum sinnum í sumar. Í kvöld var hann hins vegar afbragðsgóður og sýndi hvers megnugur hann er. Fiskaði fyrra vítið og var hættulegur út á kantinum. Tækni hans er ótrúleg og lék hann sér stundum að varnarmönnum ÍA.
Atvikið
Á 68. mínútu skoraði Garðar Gunnlaugsson frábært mark, beint úr aukaspyrnu. Óli Stefán var ekki lengi að kalla Juanma til sögunnar og kom hann inn á áður en miðjan var tekin. Á rúmum 20 mínútum, fiskaði hann víti, skoraði sigurmarkið og fékk tvö gul spjöld og þar með rautt.
Hvað þýða úrslitin?
Eftir fjóra tapleiki í röð náðu Grindvíkingar loks að sigra. Voru öflugir í leiknum og komust með sigrinum upp í 4. sæti deildarinnar. Nýliðarinar eru bara í bullandi Evrópubaráttu.
Vondur dagur
Gunnlaugur Jónsson gagnrýndi agaleysi varnarinnar hjá ÍA í kvöld. Sú gagnrýni á rétt á sér. Ef ÍA ætlar að halda sér í deild þeirra bestu, þarf varnarlína liðsins að fara að stíga upp og halda hreinu. Tvö mörk á að duga til sigurs en enn einu sinni dugar það ekki fyrir ÍA. Það er lítið eftir af mótinu er tíminn að verða naumur
Dómarinn - 8
Það verða líklega skiptar skoðanir um dómgæslu Þórodds í kvöld. Að mínu mati fannst mér hann hins vegar dæma leikinn afar vel. Vítaspyrnunar voru réttar að mínu mati, sérstaklega frá sjónarhorninu úr blaðamannastúkunni og var hann ekkert að hleypa leiknum upp í neina vitleysu, sem hefði án efa getað gerst með annan dómara við völdin. Þá fannst mér rauða spjaldið á Juanma einnig vera rétt. Hann höndlaði atvikið með Garðar Gunnlaugsson og Jajalo mjög vel og gaf Garðari gult en ekki rautt líkt og einhverjir vildu. Hefði mátt spjalda oftar, því sum brotin í leiknum verðskulduðu spjald.