SKÝRSLAN: Blikar á toppinn eftir sigur á Greifavellinum
Hvað réði úrslitum?
10 mínútna kafli í upphafi seinni hálfleiks sá til þess að stigin þrjú fara með Blikum í Kópavoginn. Þeir komust yfir eftir 45 sekúndna leik í seinni hálfleik, þar sem að KA menn fóru illa að ráði sínu í uppspili sínu. Eftir að Árni Vilhjálmsson tvöfaldaði forystu Breiðabliks þá var aldrei spurning hvoru megin sigurinn myndi lenda.
Bestu leikmenn
1. Kristinn Steindórsson
Skoraði fyrra markið og lagði upp það seinna. Hann var klókur í sínum aðgerðum og tók upp góðar stöður. Stoðsending hans á Árna var feykilega vel útfærð.
2. Gísli Eyjólfsson
Hann er eins og eimreið á fullu spani þegar hann kemst á ferðina með boltann. Var algjör miðpunktur í hröðum skyndisóknum Blika og hlutirnir fóru að ganga þegar hann fann sér pláss á miðjunni eftir hæga byrjun gestanna.
Atvikið
Mark Kristins. Seinni hálfleikur var varla byrjaður þegar að Blikar komust yfir og stúkan steinþagnaði.
Hvað þýða úrslitin?
Blikar tylla sér á toppinn þegar fjórar umferðir eru eftir og eru tveimur stigum á undan Valsmönnum og Víkingum. Þeir eiga útileik gegn Fylki í næstu umferð. KA menn stimpluðu sig formlega út úr titilbaráttunni með þessu tapi en eiga þrjá heimaleiki í síðustu fjórum umferðunum og geta gert harða atlögu að Evrópusæti. Þeir mæta Skagamönnum á sunnudaginn næsta.
Vondur dagur
KA í seinni hálfleik. Það þarf í raun ekki að orðlengja um það. Þeir mættu í krummafót eftir leikhlé og Blikarnir þökkuðu kærlega fyrir sig. Heimamönnum gekk svo afleitlega að skapa sér færi, sem einskorðaðist reyndar ekki við seinni hálfleik. Þeir áttu í mesta basli með að finna glufur á vörn Blika.
Dómarinn - 6
Hægðist verulega á leiknum eftir að Blikar komust í 0-2 og hann féll kannski stundum í þá gryfju að dæma á tittlingaskít Blikum í vil.