Heiðursvörður Valsmenn koma út á völl og klappa fyrir Víkingum sem ganga til leiks. Það er gríðarleg stemming í Víkinni og eðlilega.

Enþá einhver örfá sæti laus svo ég hvet fólk til að mæta á völlinn.

Byrjunarliðin eru klár! Arnar Gunnlaugsson þjálfari Víkinga gerir þrjár breytingar á liði sínu frá tapinu gegn Stjörnunni í Garðabæ í síðustu umferð. Pablo Punyed, Aron Elís Þrándarson og Ingvar Jónsson koma inn í lið Víkings. Þórður Ingason og Gísli Gottskálk Þórðarson fá sér sæti á bekknum og þá er Davíð Örn Atlason í leikbanni hér í dag. Birnir Snær Ingason spilar ekki í dag en hann meiddist gegn FH í leik sem fram fór á dögunum.

Arnar Grétarsson þjálfari Valsmanna gerir þrjár breytingar frá sigrinum gegn FH á Hlíðarenda í síðustu umferð. Tryggvi Hrafn Haraldsson, Birkir Heimisson og Kristinn Freyr Sigurðsson koma allir inn í liðið. Lúkas Logi Heimisson og Haukur Páll Sigurðsson fá sér sæti á varamannbekk Vals og þá er Birkir Már Sævarsson í leikbanni.



Aron Elís byrjar hjá Víkingum.




Tryggvi Hrafn kemur aftur inn í lið Valsmanna.

Sex marka leikur framundan?
Elmar Atli Garðarsson, fyrirliði Vestra sem verður í Bestu deildinni á næsta tímabili, spáir í lokaumferðina.

Víkingur 3 - 3 Valur (14:00)
Hörku leikur sem endar með jafntefli þar sem bæði lið verða ósátt í leikslok. Eina sem skiptir máli í þessum leik er hver það verður sem sækir silfurskóinn en á endanum verður það Patrick Pedersen sem setur 2 mörk. Andri Rúnar kemur inná og setur eitt mark áður en hann kemur heim í Vestra.

Arnar á hliðarlínunni í dag Arnar Gunnlaugsson var í banni þegar liðin mættust síðast, þann 20. ágúst. Víkingum héldu engin bönd, þeir unnu 4-0 sigur og margir líta á þetta sem leikinn þar sem titillinn var tryggður. Þrátt fyrir að vera í banni þá var Arnar í sambandi við aðstoðarmenn sína á bekknum og fékk á endanum sekt, enda er það ekki leyfilegt.

ÞJÁLFARI ÁRSINS 2023
Víkingur hefur verið langbesta lið Íslands í sumar. Liðið hefur haft yfirburði á Íslandsmótinu og vann bikarkeppnina enn einu sinni. Undir stjórn Arnars Gunnlaugssonar hefur Víkingur því unnið Íslandsmeistaratitilinn tvívegis og bikarmeistaratitilinn í fjórgang.

Arnar er þjálfari ársins 2023 að mati Fótbolta.net. Halldór Smári Sigurðsson leikmaður Víkings lýsti Arnari í viðtali á dögunum.

„Hann er mjög framsækinn og 'The sky is the limit' á við hjá honum. Arnar er rosalega góður að koma upplýsingum frá sér til leikmanna. Það er eitt að vera með þetta í hausnum á sér og svo annað að koma þessu til okkar. Hann er mjög góður í því að koma þessu til skila og er snöggur að bregðast við í leikjum, hann hikar ekki við það," sagði Halldór.

BESTUR 2023
Fótbolti.net velur vængmanninn Birni Snæ Ingason besta leikmann Bestu deildarinnar 2023. Þetta var opinberað í útvarpsþættinum Fótbolti.net á X977. Birnir hefur leikið við hvurn sinn fingur á tímabilinu og verið lykilmaður í liði Víkings sem vann bikarkeppnina og Íslandsmeistaratitilinn.

Hann hefur fundið stöðugleikann og blómstrað, skapað og skorað og það hefur verið algjör martröð fyrir varnarmenn að glíma við hann.

Birnir Snær er í fjórða sæti yfir flest mörk + stoðsendingar í deildinni og er sífellt ógnandi enda með næstflestar skottilraunir á tímabilinu.

Tvö bestu lið landsins Valur endar í öðru sæti. Ef Valur vinnur leikinn í dag þá vinnur Víkingur mótið með fimm stiga mun. Ef Víkingur vinnur leikinn í dag vinnur liðið mótið með ellefu stiga mun!

Fjölskylduhátíð í dag og Hamingjuballið í kvöld Víkingar ætla að skemmta sér í allan dag og fagna mögnuðum árangri sumarsins fram á nótt. Það verður fjölskylduhátíð í kringum leikinn. Það má búast við miklum fjölda á leikinn og því gott að vera tímanlega á ferðinni til að tryggja sér góð sæti.

Hamingjan verður svo sannarlega í fararbroddi í kvöld þegar Páll Óskar, Prettyboytjokko, Auddi og Steindi stíga á svið á Hamingjuballinu.

   06.10.2023 22:51

Gefa út myndband fyrir nýtt Víkingslag frá Prettyboitjokko

DÓMARI ÁRSINS 2023
Hinn reynslumikli dómari Erlendur Eiríksson hefur átt eitt sitt allra besta tímabil, af mörgum góðum. Það er mat Fótbolta.net að Erlendur hafi verið langbesti dómari Bestu deildarinnar í sumar og hann vinnur titilinn dómari ársins með yfirburðum.

Erlendur er með flautuna í dag.

SKJÖLDURINN Á LOFT! Góðan og gleðilegan daginn! Lokaumferð Bestu deildarinnar er spiluð þessa helgina og hér á Heimavelli hamingjunnar fer sjálfur Íslandsmeistaraskjöldurinn á loft, eftir leik Víkings og Vals!

Tvö bestu lið landsins að fara að mætast og ég hef ekki trú á nokkru öðru en að við fáum flotta skemmtun!


Besta-deild karla - Efri hluti
14:00 Víkingur R.-Valur (Víkingsvöllur)
14:00 FH-KR (Kaplakrikavöllur)

Besta-deild karla - Neðri hluti
14:00 ÍBV-Keflavík (Hásteinsvöllur)
14:00 Fylkir-Fram (Würth völlurinn)
14:00 KA-HK (Greifavöllurinn)