SKÝRSLAN: Meistararnir kaffærðir í Kórnum
Hvað réði úrslitum?
Víkingar eins og flestir bjuggust við stýrðu leiknum en HK-ingar breyttu í 5-manna varnarlínu og náðu að loka vel á Víkinga. Eftir fyrsta mark HK sá maður hvernig trúin margfaldaðist í liði HK-inga sem fóru fastir í öll návígi, hlupu eins og vitleysingar og börðust alveg fram á síðustu mínútu. Þetta orkustig HK-inga skilaði sigrinum í dag.
Bestu leikmenn
1. Magnús Arnar Pétursson
Magnús frábær á miðjunni í dag, á risa þátt í fyrsta markinu og skoraði frábært mark sjálfur. Aðeins 17 ára en hann skákaði bestu miðjumönnum deildarinnar.
2. Arnþór Ari Atlason
Arnþór hljóp á við þrjá og var endalaust að í leiknum, skoraði auðvitað markið til að gera út um leikinn. Til þess að vinna Víking þurfa miðjumenn liðsins að vera á sínum besta degi og það var nákvæmlega upp á teningnum hjá HK-ingum í dag.
Erfitt að velja bara tvo úr HK liðinu í dag, væri auðveldlega hægt að velja þá alla.
Atvikið
Nóg um að velja úr þessum frábæra leik, en þegar Víkingar gera tilkall til vítaspyrnu á 95. mínútu en Sigurður Hjörtur dæmir ekki og gefur Arnari Gunnlaugs rautt hlýtur að vera atvik leiksins.
Einnig er vert að minnast á þegar Pablo Punyed skallar George Nunn eftir tæklingu.
Hvað þýða úrslitin?
HK-ingar vinna sinn fyrsta sigur í deildinni á meðan Víkingar tapa sínum fyrsta leik.
HK skjótast upp í 10. sæti en Víkingar halda stöðu sinni á toppnum, en aðeins á markatölu.
Vondur dagur
Pablo Punyed var alls ekki á sínum degi. Í fyrstu tveimur mörkum HK er það Pablo sem missir boltann á hættulegum stað og HK-ingar nýttu sér það og refsuðu með tveimur mörkum.
Dómarinn - 4
Sigurður Hjörtur Þrastarson hefði hæglega getað gefið Atla Hrafni rautt spjald þegar hann fór í Djuric í fyrri hálfleik, gæti hafa spilað inní að Atli vissi upp á sig sökina og afsakaði strax. Sömuleiðis hefði Pablo Punyed getað fengið rautt spjald þegar hann skallaði George Nunn eftir tæklingu. Skallinn var ekki fastur en mjög undarleg hegðun hjá Pablo þarna. Ég er samt sem áður sammála með að sleppa því að gefa víti undir lok leiks, það hefði verið soft.