Það var sama gamla sagan í Grindavík, 0-0 þriðja leikinn í röð á Grindavíkurvelli sem hlýtur að fara að nálgast einhvers konar met, eitthvað sem Víðir Sig þarf að kanna. Grindavík hefur ekki skorað mark á heimavelli í yfir 300 mínútur en í dag fengu þeir þó nokkur fín færi. Vilhelm sá til þess að gestirnir fengu ekki á sig mark, hann átti nokkrar mjög góðar vörslur en sömuleiðis var vörn Grindavíkur góð og því markalaust jafntefli niðurstaðan.

Mjög erfitt að finna atvik sem stóð upp úr en skotfæri Inga Þórs á 78. mínútu var líklega það besta í leiknum. Gunnleifur kom boltanum inn á teiginn þar sem Ingi Þór náði að snúa og skjóta á markið en Vilhelm varði virkilega vel.

Úrslitin breyta engu nema bara bæta sitthvoru stiginu á liðin í töflunni. Grindavík er áfram í 9. sæti og ÍR í því 10. Enn er langt bil í sætin fyrir ofan þar sem Grótta vann stórsigur á Ægi og bil niður í neðstu tvö sætin þar sem nýliðarnir eru með átta stig hvor.

Það átti enginn vondan dag, varnir og markverðir liðanna áttu flottan dag en enginn sóknarmaður var skúrkur þar sem engin dauðafæri litu dagsins ljós. Við látum skemmtanagildið fá "Vondur dagur" stimpilinn í dag en það bara virðast ekki geta komið mörk í Grindavík.

Ekkert hægt að setja út á Aðalbjörn sem þurfti svo sem ekki að taka neinar stórar ákvarðanir.