Ítalía: Fiorentina steinlá fyrir Udinese

Albert Guðmundsson og félagar hans í Fiorentina steinlágu fyrir Udinese, 3-0, í 27. umferð ítölsku deildarinnar í Údín í kvöld.

Landsliðsmaðurinn sneri aftur í byrjunarliðið tæpum mánuði frá því hann byrjaði síðast leik.

Fiorentina hefur verið í miklu veseni á þessari leiktíð og hélt það áfram í kvöld. Christian Kabasele skoraði með skalla eftir fyrirgjöf Nicolo Zaniolo á 11. mínútu.

Gestirnir fengu alveg færi til að skora. Rolando Mandragora fór illa með góðar stöður og þá fór Jack Harrison illa með gott skallafæri.

Í síðari hálfleiknum skoruðu heimamenn tvö til viðbótar. Keinan Davis skoraði af vítapunktinum eftir að Daniele Rugani braut af sér í teignum og þá skoraði Adam Buksa með laglegu marki undir lok leiks.

Skelfileg úrslit fyrir Fiorentina sem er með 24 stig í 16. sæti og aðeins markatala sem heldur liðinu fyrir ofan fallsæti, en Udinese er í 10. sæti með 35 stig.