Tottenham kvartaði yfir samfélagsmiðlafærslu ensku úrvalsdeildarinnar

Enska úrvalsdeildin hefur eytt færslu á samfélagsmiðlinum X þar sem grín er gert að Guglielmo Vicario, markverði Tottenham.

Tottenham kvartaði yfir færslunni en þar var 13 sekúndna myndband af Vicario taka hörmulega aukaspyrnu sem endaði í markspyrnu hinumegin.

Í færslunni var broskall að gráta úr hlátri og skrifað við: 'Áhugaverð aukaspyrna frá Vicario' og svo 'úps'.

Tottenham hafði samband við ensku úrvalsdeildina og sagði þá skoðun sína að deildin ætti ekki að gera grín að eigin liðum og leikmönnum. Tottenham er aðeins fjórum stigulm frá fallsvæðinu eftir að hafa tapað 2-1 gegn Fulham í gær.

Tottenham hefur tapað fjórum leikjum í röð og er án sigurs í tíu deildarleikjum en liðið mætir Crystal Palace í vikunni.