U21: Kristall með þrennu í mögnuðum sigri gegn Danmörku

Kristall Máni Ingason fór á kostum þegar U21 landslið Ísland vann magnaðan sigur á Danmörku í undankeppni EM á Víkingsvellinum í dag.

Danir byrjuðu leikinn betur og skoraði William Osula fyrsta mark leiksins. Newcastle keypti hann á 15 milljónir punda í sumar og getur kaupverðið hækkað um 5 milljónir punda til viðbótar.

En tveir Víkingar sneru leiknum við fyrir íslenska liðið; Kristall Máni jafnaði metin á 28. mínútu eftir að hafa unnið boltann af varnarmanni Danmerkur og Ari Sigurpálsson mætti svo á fjærstöngina rétt fyrir hálfleik og koma Íslandi yfir.

Snemma í seinni hálfleik jafnaði Mathias Kvistgaarden fyrir Danmörku á nýjan leik. Spennan var mikil en á 73. mínútu fékk Ísland vítaspyrnu þegar Hilmir Rafn Mikaelsson gerði virkilega vel. Vítaspyrna var dæmd og á sama tíma fékk Sebastian Otoa að líta rauða spjaldið.

Kristall fór á punktinn og skoraði en stuttu eftir það fullkomnaði hann þrennu sína. Honum líður svo sannarlega vel á Víkingsvelli.

Lokatölur 4-2 fyrir Ísland; frábær sigur í baráttunni um að komast á lokakeppni EM. Ísland er núna með níu stig eftir fimm leiki, tveimur stigum frá Danmörku sem er á toppi riðilsins. Danir voru taplausir fyrir leikinn.

Núna klukkan 18:45 hefst leikur Ísland og Svartfjallalands í Þjóðadeildinni en vonandi ná strákarnir í A-landsliðinu að fylgja eftir mögnuðum sigri U21 landsliðsins.