England: Man Utd vann fjórða leikinn í röð - Romero skúrkurinn

Manchester United vann fjórða deildarleikinn í röð er liðið lagði tíu leikmenn Tottenham, 2-0, í 25. umferð ensku úrvalsdeildarinnar á Old Trafford í dag.

United-menn byrjuðu af krafti og fékk Bryan Mbeumo gott færi til þess að skora strax á fyrstu mínútunni en skot hans framhjá markinu og þá átti Matheus Cunha tilraun rétta framhjá sömuleiðis.

Nokkrum mínútum síðar umtalaðasti leikmaður Tottenham síðustu vikur, Cristian Romero, að líta rauða spjaldið fyrir tæklingu á Casemiro. Romero var of seinn og steig á Casemiro.

Þetta var annað rauða spjaldið sem Romero fær á tímabilinu og þar með kominn í fjögurra leikja bann.

Þetta hjálpaði United-mönnum í leit að fjórða sigrinum í röð en níu mínútum síðar skoraði Mbeumo með lúmsku skoti eftir vel útfærða hornspyrnu Bruno Fernandes á Kobbie Mainoo, sem kom boltanum á Mbeumo. Hann fékk boltann í miðjum teignum og skaut boltanum með hnitmiðuðu en ekkert svo föstu skoti neðst í hægra hornið.

Stuttu síðar varði Guglielmo Vicario frá Casemiro. Man Utd með algera yfirburði þegar flautað var til loka fyrri hálfleiks.

Sagan var ekki heldur að hjálpa Tottenham, en fyrir þennan leik hafði United aldrei tapað þegar liðið hefur verið með forystu í hálfleik í ensku úrvalsdeildinni og var það ekkert að fara breytast í dag.

Amad Diallo taldi sig hafa komið United í 2-0 forystu snemma í síðari hálfleiknum eftir að Luke Shaw kom boltanum á fjærstöngina þar sem Diallo lúrði, en markið var tekið strax af vegna rangstöðu. Afar tæpt.

United náði í annað markið til að ganga frá leiknum. Diogo Dalot kom með frábæra fyrirgjöf inn á teiginn, í gegnum pakkann og á Bruno Fernandes sem afgreiddi boltann laglega í hægra hornið og gulltryggði sigurinn.

Fjórði deildarsigur Man Utd í röð sem er í 4. sæti með 44 stig, fjórum stigum á undan Chelsea sem er í fimmta sætinu og vonir United um að komast í Meistaradeildina á næsta tímabili heldur betur að aukast. Tottenham er í 14. sæti með aðeins 29 stig.

Man Utd mætir næst West Ham í Lundúnum og það á eftir að verða taugatrekkjandi stund fyrir United-stuðningsmanninn Frank Ilett sem ákvað í október 2024 að hætta að klippa á sér hárið þangað til United myndi vinna fimm leiki í röð. Sá er orðinn heldur hárprúður, en það er aldrei að vita nema hárið fái að fjúka í næstu viku.