Celtic og Lazio mættust tvívegis í riðlakeppni Evrópudeildarinnar á dögunum og höfðu skosku meistararnir óvænt betur bæði heima og að utan.
Fyrri leiknum lauk með 2-1 sigri Celtic í Glasgow þar sem bæði skot heimamanna sem hittu rammann fóru í netið. Stuðningsmenn Celtic voru með borða gegn fasisma á vellinum og móðguðu marga Ítali með einum borða sérstaklega.
Á borðanum var Benito Mussolini hangandi á ökklunum en Ultras stuðningsmannahópur Lazio er oft bendlaður við fasisma. Fyrir mörgum í þeim hópi er Mussolini í guðatölu.
Sturlaðar fótboltabullur frá Róm ákváðu að hefna sín á stuðningsmönnum Celtic í seinni leiknum, sem fór fram á fimmtudagskvöldið.
Fyrir leikinn var setið fyrir tveimur stuðningsmönnum Celtic og þeir stungnir. Eftir leikinn var svo annar stunginn og því í heildina þrír sem þurftu að fara á spítala með stungusár.
Celtic vann seinni leikinn 1-2, stuðningsmönnum Lazio til mikillar gremju, og gerði Olivier Ntcham sigurmarkið. Ntcham varð fyrir kynþáttaníði í leiknum og svaraði fyrir sig þegar hann fagnaði sigurmarkinu, með því að leika Mussolini hangandi á ökklunum.
Athugasemdir