Arsenal gat náð sex stiga forystu á Man City í titilbaráttunni með sigri á Brentford í kvöld.

Fyrri hálfleikurinn var mjög bragðdaufur en Igor Thiago fékk besta tækifæri fyrri hálfleiksins þegar hann átti skalla að marki af stuttu færi en David Raya varði frábærlega frá honum.

Bæði lið fengu góð færi í upphafi seinini hálfleiks en Noni Madueke braut ísinn fyrir Arsenal eftir klukkutíma leik. Piero Hincapie átti fyrirgjöf og Madueke átti góðan skalla og boltinn hafnaði í netinu.

Michael Kayode komst í góða stöðu til að jafna metin stuttu síðar en Gabriel komst fyrir og varði frábærlega með höfðinu.

Brentford náði hins vegar að jafna metin. Kayode tók langt innkast og Sepp van den Berg skallaði boltann til Keane Lewis-Potter og hann skallaði boltann í netið.

Igor Thiago gat innsiglað sigur Brentford undir lok leiksins þegar hann kom sér framhjá Cristhian Mosquera en sá síðarnefndi gerði gríðarlega vel og komst fyrir skotið.

Brentford var sterkari aðilinn í uppbótatímanum en kom boltanum ekki í netið. Gabriel Martinelli hefði getað innsiglað sigur Arsenal þegar þrjár mínútur voru komnar fram yfir venjulegan leiktíma. Arsenal komst í skyndisókn og Martinelli var einn gegn Caoimhin Kelleher en markvörðurinn náði að loka á skotið.

Arsenal er á toppnum með 57 stig, fjórum stigum á undan Man City. Brentford er í 7. sæti með 42 stig, tveimur stigum á eftir Liverpool.