England: Nketiah henti blautri tusku í andlitið á Fulham-mönnum

Arsenal og Fulham gerðu jafntefli í Lundúnarslag í dag. Staðan var markalaus í leikhléi en í seinni hálfleik skoraði Josh Maja fyrra markið úr vítaspyrnu á 59. mínútu.

Maja var þar að skora sitt þriðja útivallarmark fyrir Fulham í vetur. Deni Ceballos skoraði mark fyrir Arsenal undir lok fyrri hálfleiks en það var dæmt af þar sem Bukayo Saka var rangstæður í aðdragandanum - mjög, mjög tæpt.

Þá átti Bukayo Saka stangarskot í seinni hálfleiknum en inn vildi boltinn ekki þá stundina. Arsenal tókst að jafna leikinn á sjöundu mínútu uppbótartíma. Varamaðurinn Eddie Nketiah var réttur maður á réttum stað og kom boltanum í netið eftri að Alphonse Areola varði tilraun Arsenal manna eftir hornspyrnu.

Fulham missir af tveimur dýrmætum stigum í baráttunni um sæti í deildinni á næsta tímabili. Arsenal er um miðja deild.