KA heimsótti Stjörnuna á Samsung-völlinn í kvöld og gerði 1-1 jafntefli í 20.umferð Pepsí-deildar karla. Srdjan Tufegdzig þjálfari KA manna virðir stigið þótt hann hefði viljað klára leikinn í stöðunni 1-0.
Lestu um leikinn: Stjarnan 1 - 1 KA
„Mér fannst KA spila flottan leik í dag, hörkuleik og eina sem situr í mér er að við fengum dauðafæri í stöðunni 1-0 til að sigla þessu heim en á endanum virði ég þetta stig enda eitt besta lið á landinu."
Túfa er að hætta með liðið eftir tímabilið og segir að liðið sé tilbúið að fara á næsta stig og muni gera það á næstu árum.
„Mér finnst þessir leikir sýna hvað við erum búnir að gera góða hluti fyrir norðan síðan ég tók við. Það vantar þennan herslumun uppá til að fara með liðið á næsta stig og ég hef engar áhyggjur af öðru en að það gerist."
Túfa viðurkennir að þessi vika hafi verið erfið fyrir sig enda er hann að kveðja lið sem hann hefur verið hjá í að verða 13 ár. Túfa gengur stoltur frá borði og þakkar KA fyrir frábær ár.
„Þessi vika var rosalega erfið fyrir mig ef ég að segja eins og er, maður er búinn að fá ótal skilaboð og símtöl frá fólki sem vil ekki sætta sig við þessa niðurstöðu. Ég er þannig maður að ég vil ganga stoltur frá borði og klára þetta vel. Mér fannst þessi þrjú ár vera magnað afrek hjá öllum sem vinna í kringum félagið."
Athugasemdir