Svíar komust inn í umspilið vegna góðs árangurs í Þjóðadeildinni og ætla að nýta sér það til fulls.

Gyökeres skoraði öll þrjú mörkin í 3-1 sigri Svía á Úkraínu í undanúrslitum umspilsins. Fyrsta markið gerði hann á sjöttu mínútu og annað snemma í þeim síðari.

Hann fullkomnaði þrennuna úr vítaspyrnu tuttugu mínútum fyrir leikslok. Matvii Ponomarenko minnkaði muninn undir lok leiks en það var allt of seint fyrir Úkraínu sem er úr leik.

Svíar mæta Póllandi sem unnu 2-1 sigur á Albaníu. Albanir fóru með 1-0 forystu inn í hálfleikinn en þeir Robert Lewandowski og Piotr Zielenski sáu til þess að senda Pólland áfram. Sebastian Szymanski lagði upp bæði mörkin.

Sandro Tonali skoraði og lagði upp í 2-0 sigri Ítala á Norður-Írum, en hann gerði mark sitt á 56. mínútu áður en hann lagði annað markið upp fyrir Moise Kean undir lok leiksins.

Ítalía mætir Wales eða Bosníu í úrslitum umspilsins, en það er framlenging í gangi þar. Staðan er 1-1 en Edin Dzeko skaut Bosníu í framlengingu með marki undir lok venjulegs leiktíma.

Strákarnir hans Heimis Hallgrímssonar í Írlandi eru einnig í framlengingu, en staðan þar er 2-2. Írar komust í tveggja marka forystu þökk sé Troy Parrott og sjálfsmarki Matej Kovar, en Tékkarnir komu til baka.

Patrik Schick minnkaði muninn úr vítaspyrnu á 27. mínútu og jafnaði Wolves-maðurinn Ladislav Krejci metin á 86. mínútu. Rafmagnaður leikur í gangi í Prag.

Sigurvegarinn úr einvíginu mætir Dönum sem unnu 4-0 stórsigur á Norður-Makedóníu. Gustav Isaksen skoraði tvö og þá komust þeir Mikkel Damsgaard og Christian Norgaard einnig á blað.

Kósóvó vann ótrúlegan 4-3 sigur á Slóvakíu og mæta því Tyrkjum í úrslitaeinvígi.

Slóvakar fóru með 2-1 forystu inn í hálfleikinn, en Kósóvó skoraði síðan þrjú mörk á 25 mínútum í þeim síðari til þess að tryggja sæti sitt í úrslitaleikinn.

Úrslit og markaskorarar:

Danmörk 4 - 0 Norður-Makedónía
1-0 Mikkel Damsgaard ('49 )
2-0 Gustav Isaksen ('58 )
3-0 Gustav Isaksen ('59 )
4-0 Christian Norgaard ('75 )

Ítalía 2 - 0 Norður-Írland
1-0 Sandro Tonali ('56 )
2-0 Moise Kean ('80 )

Pólland 2 - 1 Albanía
0-1 Arber Hoxha ('42 )
1-1 Robert Lewandowski ('63 )
2-1 Piotr Zielinski ('73 )

Slóvakía 3 - 4 Kósóvó
1-0 Martin Valjent ('6 )
1-1 Veldin Hodza ('21 )
2-1 Lukas Haraslin ('45 )
2-2 Fisnik Asllani ('47 )
2-3 Florent Muslija ('60 )
2-4 Kreshnik Hajrizi ('72 )
3-4 David Strelec ('90 )

Úkraína 1 - 3 Svíþjóð
0-1 Viktor Gyokeres ('6 )
0-2 Viktor Gyokeres ('51 )
0-3 Viktor Gyokeres ('72 , víti)
1-3 Matvii Ponomarenko ('90 )