Ítalía: Bologna vann Íslendingalið Venezia

Mikael Egill Ellertsson og Bjarki Steinn Bjarkason byrjuðu báðir á bekknum þegar Venezia heimsótti Bologna í ítölsku deildinni í kvöld.

Bologna var með 1-0 forystu í hálfleik en það var Dan Ndoye sem skoraði markið úr vítaspyrnu.

Mikael Egill kom inn á sem varamaður og spilaði allan seinni hálfleikinn en hann komst ekki á blað.

Bologna fékk aðra vítaspyrnu en í þetta sinn steig Riccardo Orsolini á punktinn þegar hann var nýkominn inn á sem varamaður og skoraði. Ndoye innsiglaði sigur liðsins stuttu síðara eftir undirbúning Orsolini.

Bjarki Steinn kom við sögu í fyrsta sinn á tímabilinu í síðustu umferð eftir erfið meiðsli en hann var ónotaður varamaður í kvöld. Venezia er á botni deildarinnar, þremur stigum frá öruggu sæti en Bologna er í 8. sæti með 21 stig.