Spá þjálfara í 2. deild: 8. sæti

Spáin:
1.
2.
3.
4.
5.
6.
7.
8. KFG, 54 stig
9. Völsungur, 37 stig
10. Reynir S., 35 stig
11. KF, 27 stig
12. Kormákur/Hvöt, 13 stig

8. KFG
KFG kom skemmtilega á óvart í fyrra. Það var alls ekki mikil trú á KFG fyrir tímabilið á meðal þjálfara deildarinnar og var þeim spáð neðsta sæti. Garðarbæjarfélagið hafði árið áður lent í þriðja sæti 3. deildar en þeir fóru upp um deild eftir að það varð ljóst að Kórdrengir myndu ekki taka þátt í Íslandsmótinu. Þeir fengu að vita það með litlum aðdraganda að þeir væru að spila í 2. deild en þeir fljótir að aðlagast og gerðu miklu betur en margir þorðu að vona. Liðið var í toppbaráttu stærstan hluta tímabils en missti dampinn í síðustu umferðunum er liðið tapaði fimm leikjum af sex og hafnaði því í áttunda sæti með 30 stig. KFG er og hefur alltaf verið stemningslið en liðið samanstendur nánast eingöngu af sprækum Garðbæingum. Það er skemmtilegt að horfa á þá spila fótbolta.

Þjálfarinn: Það var þjálfarabreyting í Garðabænum eftir síðustu leiktíð. Bræðurnir Björn og Kristján Mássynir hættu þjálfun liðsins og í þeirra stað tók Veigar Páll Gunnarsson við stjórnartaumunum. Bræðurnir tóku við KFG þegar liðið spilaði í 4. deild en þeir stýrðu liðinu í sjö tímabil og komust tvisvar upp í 2. deild. Veigar Páll er goðsögn í Garðabæ og var lengi atvinnu- og landsliðsmaður. Hann hefur á undanförnum árum þjálfað yngri flokka Stjörnunnar en hann stígur núna í sitt fyrsta starf sem aðalþjálfari í meistaraflokki.

Stóra spurningin: Hvernig gengur Veigari Páli með liðið?
Veigar Páll er með alvöru ferilskrá sem leikmaður og er klárlega einn besti fótboltamaður sem komið hefur úr Garðabæ, ef ekki bara sá besti. En hann er núna að fara inn í sitt fyrsta aðalþjálfarastarf í meistaraflokki og það verður gríðarlega gaman að sjá hvernig það fer. Hann er að taka við af mönnum sem voru lengi með liðið og það er örugglega ekki auðvelt að koma á eftir þeim, en hann getur alveg klárlega gert það.

Lykilmenn:
Jón Arnar Barðdal: Sóknarmaður sem sprakk skemmtilega út í Bestu deildinni með HK fyrir nokkrum árum. Hann færði sig yfir í KFG fyrir tímabilið 2022 og spilar þar mikilvægt hlutverk núna. Gerði tíu mörk í 19 leikjum í 2. deild í fyrra, og það eru klárlega hæfileikar þarna til að fara í tveggja stafa tölu aftur. Hann er búinn að vera heitur á undirbúningstímabilinu.

Kári Pétursson: Fjölhæfur leikmaður sem er með ágætis reynslu úr Bestu deildinni, rétt eins og Jón Arnar. Hann getur leyst margar stöður á vellinum. Hann kemur með fæting og hann getur skorað fyrir þig mörk.

Tómas Orri Almarsson: Herra KFG ef svo má segja. Uppalinn í Stjörnunni en hefur leikið með KFG alveg frá 2016 og er algjört hjarta í þessu liði. Skemmtilegur karakter og finnst andstæðingnum óþolandi að mæta honum.

Komnir:
Adrían Baarregaard Valencia frá Þrótti R. (á láni)
Bjarki Flóvent Ásgeirsson frá Sindra
Darri Már Garðarsson frá KFK
Guðmundur Ísak Bóasson frá Þrótti R.
Guðmundur Páll Einarsson frá Vestra
Helgi Snær Agnarsson frá Vængjum Júpiters
Jóhannes Flosi Rúnar Ingason frá Elliða
Svo hafa nokkrir ungir leikmenn komið frá Stjörnunni

Farnir:
Kristófer Leví Sigtryggsson í Grindavík (var á láni frá Gróttu)
Stefán Alex Ríkarðsson í KÁ
Svo hafa nokkrir leikmenn farið aftur í Stjörnuna

Þjálfarinn segir - Veigar Páll Gunnarsson
„Það er bara mikil spenna og tilhlökkun í herbúðum KFG fyrir sumrinu."

„Við höfum æft virkilega vel í vetur og nýtt tímann og þessa vetrarleiki til þess að hnoða okkur saman og slípa okkar áherslur. Við erum líka virkilega ánægðir með þá leikmenn sem hafa komið til okkar þannig að ég tel að hópurinn okkar sé bara orðinn ansi glæsilegur."

„Okkur er spáð áttunda sæti sem er bara gott og blessað en við teljum okkur geta gert mikið betur en það og ætlum okkur hærra í töflunni."

Fyrstu þrír leikir KFG:
4. maí, KFG - KF (Samsungvöllurinn)
10. maí, KFG - Haukar (Samsungvöllurinn)
18. maí, Höttur/Huginn - KFG (Fellavöllur)