SKÝRSLAN: Jafntefli í slagnum um 3. sætið
Hvað réði úrslitum?
Þórsarar gáfust ekki upp þó þeir hafi lent tveimur mörkum undir í fyrri hálfleik og komu sterkir til baka í seinni hálfleiknum og voru betra liðið á vellinum. Það skilaði þeim stigi í dag.
Bestu leikmenn
1. Gunnar Örvar Stefánsson, Þór
Öflugur í framlínunni og skoraði tvö góð mörk. Átti nokkur færi til viðbótar til að skora þriðja markið.
2. Hörður Sveinsson, Keflavík
Það er alltaf von á mörkum frá Herði og eins og vaninn er á haustin komu tvö frá honum í dag og hann skapaði sér færi til að bæta enn meira við þó það hafi ekki tekist.
Atvikið
Þór komst inn í leikinn eftir klukkutíma leik þegar Gunnar Örvar kom þeim í 2-1. Það var þó nokkuð skondið að andartaki áður var Gunnar Örvar í dauðafæri en hitti ekki boltann, boltinn lá því dauður fyrir framan hann og hann reyndi aftur og smellihitti þá og skoraði. Þriðja markið skiptir oft sköpum í leikjum segja þeir.
Hvað þýða úrslitin?
Keflavík hefði þurft að vinna til að tryggja sér 3. sætið í deildinni en þeir eru enn í bílstjórasætinu hvað það varðar en ef þeim mistekst gegn Leikni í lokaleiknum getur Þór hirt það. Ekki að 3. sæti í Inkasso deildinni gefi neitt meira en 9. sæti einu sinni en það er þó betra enda sem efst.
Vondur dagur
Axel Kári Vignisson vinstri bakvörður Keflavíkur átti í vandræðum með að verjast Þórsurum í dag og bæði mörkin komu í gegnum kantinn sem hann átti að verja.
Dómarinn - 8
Stóð sig vel í leiknum í dag og ekkert út á hann að setja.