SKÝRSLAN: Leiknismenn kláruðu sex stiga slaginn í fyrri hálfleik
Hvað réði úrslitum?
Snarpur leikkafli hjá Leiknismönnum í fyrri hálfleiki þar sem þeir nýttu sér til fullnustu hraðar sóknir með Sólon Breka í farabroddi. Skilaði þessi leikkafli heimamönnum þremur góðum mörkum og eftir sátu gestirnir vankaðir og í ansi djúpri gryfju.
Bestu leikmenn
1. Sólon Breki Leifsson
Síógnandi í leiknum og olli varnarmönnum Magna stanslausum höfuðverk. Skoraði gott mark og átti svo lykilsendingu í þriðja marki Leiknismanna.
2. Sævar Atli Magnússon
Mark og stoðsending í dag hjá Sævar sem var jafnframt iðinn og vann óeigingjarna vinnu fyrir sína menn. Hefði mátt gera betur í tveimur færum en framlagið taldi þegar upp var staðið.
Atvikið
Stórkostleg tækling Bjarka Aðalsteins á 5 mínútu. Gunnar Örvar var nánast inni í marki Leiknismanna þegar Bjarki henti sér í einhverja dramatískustu tæklingu sem sést hefur á Leiknisvelli og komst fyrir skot Gunnars sem af þessu færi hefði sennilega hafnað í markinu. Stórt atvik og hefði verið risa EF og HEFÐI ef Magnamenn hefðu tekið forystuna þarna.
Hvað þýða úrslitin?
Úrslitin þýða að Leiknismenn jafna Njarðvíkinga að stigum í 9.sæti en eru með lakari markatölu. Aukinheldur blanda Leiknismenn sér í þéttan miðjupakka sem ætti að gefa liðinu tækifæri á að líta upp töfluna. Magnamenn fara hinsvegar særðir norður í Grenivík, áfram í botnsæti deildarinnar.
Vondur dagur
Davíð Rúnar Birgisson virkaði hreint út sagt ekki í líkamlegu ásigkomulagi til að standa vaktina í leik á þungum velli sem þessum. Skilaði boltanum illa frá sér á stundum, seinn á fótunum og var einfaldlega í tómu basli og brasi langtímunum saman í dag.
Dómarinn - 6
Elías Ingi dæmdi þetta ágætlega. Ekki flekklaus frammistaða og þá aðallega leikkafli í síðari hálfleik þar sem Elías virtist aðeins missa einbeitinguna.