SKÝRSLAN: Gunnar Örvar gerði gæfumuninn á Grenivík
Hvað réði úrslitum?
Gunnar Örvar Stefánsson skoraði þrjú mörk og var alger lykill að sigri í dag. Magnamenn seldu sig dýrt og kláruðu sig algjörlega til þess að hirða stigin þrjú sem voru í boði.
Bestu leikmenn
1. Gunnar Örvar Stefánsson
Skoraði þrennu og var svo mikilvægur í öllu sóknarspili Magna. Hann er martröð fyrir varnarmenn á sínum degi. Svo mikilvægur fyrir Magnaliðið.
2. Aron Elí Gíslason
Skildi á milli í lokin. Varði aukaspyrnu Stefáns Birgis frábærlega seint í leiknum og greip inní á mikilvægum augnablikum.
Atvikið
Annað mark Njarðvíkur var frábært mark. Það hefðu fáir, ef einhverjir, varið skot Andra Gíslasonar. Hann sneri boltann til Júpíters og til baka, stöngin inn. Snilldarlega gert.
Hvað þýða úrslitin?
Magni næla sér í lífsnauðsynlega þrjá punkta og fara upp í 5 stig og eru nú stigi á eftir Aftureldingu og Haukum. Njarðvík eru í 9. sæti með 7 stig. Njarðvíkingar fá Aftureldingu í heimsókn en Magnamenn ferðast til Seltjarnarness og mæta Gróttu.
Vondur dagur
Vörn Njarðvíkur átti ekki góðan dag. Hún hefur staðið sig vel í sumar, en virkaði brothætt í dag og hefði getað fengið á sig fleiri mörk.
Dómarinn - 4
Var ekki samkvæmur sjálfum sér. Sömuleiðis voru nokkrar ákvarðanir aðstoðardómaranna tveggja frekar undarlegar.